Asino ti mangsangaili iti GF Convention 2015?

Silulukaten ti panag-bid dagiti probinsial a sanga ti GUMIL Filipinas nga interesado a mangsangaili iti sumaruno a kombension nasional ti GF a maangay inton Kalgaw 2015.

Daytoy ti napagnunumuan iti kaudian a regular board meeting ti gunglo a naangay iti Siudad ti Laoag. Maipalagip a nagsaruno a sinangaili ti GUMIL Cagayan ti kombension, idi 2013 (Gonzaga) ken 2014 (Claveria).

Iti sabali a bangir, maangay ti maika-6 a regular board meeting ti GF inton Agosto 31, 2014 iti Tuding, Itogon, Benguet iti panangsangaili da GF Auditor Estela Bisquera-Guerrero ken kaingungotna a Rey Guerrero.

Kangrunaan a mataming iti miting ti bidding nga idatag/indatag dagiti interesado a provincial chapters a mang-host iti sumaruno a kombension nasional. Mainaig itoy, maibalakad kadagiti presidente (wenno pannakabagida) ti chapter a nag-bid ti nasken nga idadar-ayda tapno mapagsasaritaaan a nalaing dagiti proposalda a mangsangaili iti kombension.

Ipaganetget ni Presidente Arthur P. Urata Sr., ti idadar-ay amin nga opisial: Mario Tejada (bise-presidente), Eden C. Bulong (treasurer), Benjamin P. Pacris (business manager), Reynaldo E. Andres (PRO); ken dagiti direktor: Sherma E. Benosa, Emy Amad Z. Bucaneg, Eliseo B. Contillo, Freddie P. Masuli, Aileen R. Rambaud, Martin T. Rochina, Ariel S. Tabag ken Vilmer V. Viloria.

Manamnama pay ti kaaddanto dagiti mamagbaga ti gunglo: Juan S.P. Hidalgo Jr., Jose A. Bragado, Manuel S. Diaz, Baldovino A. Valdez, ken Cles B. Rambaud.

Maigunamgunam met ti itatabuno dagiti chapter president: Villamor Visaya (Isabela), Elizabeth M. Raquel (Ilocos Norte), Edilberto H. Angco (Ilocos Sur), Djuna R. Alcantara (La Union), Fernando B. Sanchez (Pangasinan), ken Joey Guzman (Abra).

Indawat met ni GF Auditor Estela B. Guerrero ti idadar-ay koma dagiti amin a mannurat nga interesado nga agkameng iti mabuagay a GUMIL Benguet a kas kada Prof. Junley L. Lazaga ti UP Baguio, Dumay Solinggay, Io Jularbal, Perlas A. Dacuag, Rosalie V. Calpito, ken dadduma pay.

Para iti dadduma pay nga impormasion, kontaken dagitoy a numero ti selpon: 0927-7927913 (APU), 0918-9632254 (EBG), wenno ag-e-mail iti rvaragon@gmail.com, wenno ag-send iti message iti Facebook iti rvaragon@facebook.com.

Ituloy a Basaen

Maika-46 a Nailian a Kombension ti GF: Abril 18-20

Angayen ti GUMIL Filipinas (GF), ti kadakkelan a gunglo dagiti mannurat nga Ilokano iti sangalubongan, ti Maika-46 a Nailian a Kombension ti GF iti daytoy Abril 18-20, 2-14 iti Cabicungan Inn, Centro 05, Claveria, Cagayan (nayakar manipud iti Sanchez Mira, kas immunan a naipakaammo).

Maaw-awagan pay iti Dap-ayan daytoy a panagtataripnong dagiti mannurat, panangrambak metten iti Abril a kas “Bulan ti Literatura Dagiti Ilokano,” kas sagudayen ti Presidential Proclamation No. 26 idi 2001.

Sangailien daytoy ti GUMIL Cagayan (GC) nga idauluan ni GC Pres. Freddie Pa. Masuli, kinuna ni Arthur P. Urata, Sr., presidente ti GF, a manamnama a dumar-ay saan laeng a dagiti delegado manipud kadagiti sanga ti GF iti Filipinas no di pay ket iti ballasiw-taaw, nangruna ti GUMIL Oahu ken GUMIL Maui.

Agpaay a keynote speaker ni Dr. Jim P. Domingo, mabigbigbig a mannurat ken iskolar iti kultura iti Cagayan, a mangwarwar iti tema ti kombension a “Ni Mannurat nga Ilokano ken ti Kultural a Panagdur-as.”

Kas kadagiti kallabes a nailian a kombension, aglektiur dagiti kangrunaan a mannurat nga Ilokano maipanggep iti panagsurat iti sarita, daniw, nobela, salaysay, ken panagipatarus para kadagiti beterano a mannurat. Para kadagiti mangisursuro ken agdadamo a mannurat, maipangruna met a matratar ti literatura para kadagiti ubbing, ken ti ortograpia ti lengguahe nga Ilokano.

Iti pay nasao a kombension a mapadayawan dagiti mannurat a nangabak kadagiti nadumaduma a salip iti panagsuratan a kas iti 1st Mayor Carlito F. Pentecostes, Jr. Literary Awards (CFPJ Awards), salip iti sarita a para iti agdadamo ken beterano; 1st Premio Diretso Manipud iti Puso (Premio Diretso), salip iti daniw ni ayat; 16th AMMA Foundation Literary Awards (AMMAFLA), salip iti sarita a para kadagiti agdadamo; 12th Reynald F. Antonio Awards for Iloko Literature (RFAAFIL), salip iti daniw ken sarita a para ubbing; ken 3rd Alex Vicente Yadao Foundation Literary Awards (ALVIYA), salip iti sarita.

Mayalnag met ti libro nga Operation: Medalla Cartel ni nobelista iti Bannawag Norberto D. Bumanglag, Jr.

Adda met maangay a “Subasta ti RFAAFIL Para iti GUMIL” a pakaisubastaan ti 46 nga agdudumat a ramit a kas wagas iti panagur-or iti pondo a para kadagiti proyekto ti GF.

Mapadayawan pay a kas 2014 Pedro Bucaneg awardee ni Crisostomo M. Ilustre. Ti Pedro Bucaneg award ti kangatuan a pammadayaw a yaw-awat ti GUMIL Filipinas kadagiti mannurat nga Ilokano nga agsursurat iti Ilokano a nakaipaay iti naisangsangayan a gapuanan iti pannakaidur-as ti literatura dagiti Ilokano.

Mabalangatan met ti 2014 Mrs. GUMIL Filipinas a manamnama a pakipartisiparan dagiti amin a sanga ti GUMIL Filipinas.

Malaksid kadagitoy, maipabuya ken maipangngeg dagiti oral a kannawidan ken sala ken samiweng dagiti Ilokano.

Para iti rehistrasion, P600 ti bayadan dagiti regular a delegado, P500 kadagiti adda ID-na a senior citizen, ken P400 kadagiti adda ID-na nga estudiante (malaksid iti eskuela graduado). Maaramat ti registration fee iti kanen ken pagturogan, sertipiko, kdp. a kasapulan iti 3 nga aldaw ken dua a rabii a kombension.

Para kadagiti saludsod mainaig iti taripnong, ag-text iti 0948-986-4481 (FPM), 0927-792-7913 (APU), ken 0915-984-2149 (VVV). (Dap-ayan 2014 Secretariat)

Ituloy a Basaen

Bulan ti Literatura Dagiti Ilokano, rambakan ti GF

Rambakan ti GUMIL Filipinas (GF), ti kadakkelan a gunglo dagiti mannurat nga Ilokano iti sangalubongan, ti Abril a kas “Bulan ti Literatura Dagiti Ilokano,” kas sagudayen ti Presidential Proclamation No. 26 idi 2001, babaen ti panangiwayatna iti “Dap-ayan 2014,” ti Maika-46 a Nailian a Kombension ti GF iti daytoy Abril 18-20, 2-14 iti Cabicungan Inn, Centro 05, Claveria, Cagayan (nayakar manipud iti Sanchez Mira, kas immunan a naipakaammo).

Sangailien daytoy ti GUMIL Cagayan (GC) nga idauluan ni GC Pres. Freddie Pa. Masuli, kinuna ni Arthur P. Urata, Sr., presidente ti GF, a manamnama a dumar-ay saan laeng a dagiti delegado manipud kadagiti sanga ti GF iti Filipinas no di pay ket iti ballasiw-taaw, nangruna ti GUMIL Oahu ken GUMIL Maui.
Kas kadagiti kallabes a nailian a kombension, aglektiur dagiti kangrunaan a mannurat nga Ilokano maipanggep iti panagsurat iti sarita, daniw, nobela, salaysay, literatura para kadagiti ubbing, ken maipanggep iti Ortograpia Dagiti Ilokano ken iti panagipatarus.

Iti pay nasao a kombension a mapadayawan dagiti mannurat a nangabak kadagiti nadumaduma a salip iti panagsuratan ken dagiti mannurat a nakaipaay iti naisangsangayan a kontribusion iti panagdur-as ti Literatura dagiti Ilokano, mayalnag dagiti libro, mabalangatan ti 2014 Mrs. GUMIL Filipinas, ken maipabuya/maipangngeg dagiti oral a kannawidan ken sala ken samiweng dagiti Ilokano.

Para iti rehistrasion, P600 ti bayadan dagiti regular a delegado, P500 kadagiti adda ID-na a senior citizen, ken P400 kadagiti adda ID-na nga estudiante (malaksid iti eskuela graduado). Maaramat ti registration fee iti kanen ken pagturogan, sertipiko, kdp. a kasapulan iti 3 nga aldaw ken dua a rabii a kombension.

Para kadagiti saludsod mainaig iti taripnong, ag-text iti 09489864481 (FPM) ken 09277927913 (APU).
Mainaig itoy, maipakaammo kadagiti amin nga opisial ti GF a maangay ti special meeting itoy Marso 30, 2014 iti Narvacan, Ilocos Sur babaen ti panagsangaili da agkaingungot a Dionisio ken Eden Bulong. (RVA)

Ituloy a Basaen

46th GF Convention inton Abril 18-20, mapagpapatangan iti GF Board Meeting

Maysa kadagiti kangrunaan a mataming iti maikapat a GUMIL Filipinas board meeting inton Marso 1 ti pannakaangay ti 46th GF National Convention inton Abril 18-20 iti MASCOOP Resort and Training Center, Masisi, Sanchez Mira, Cagayan, kas impakaammo ni GF President Arthur P. Urata, Sr.

Sangailien ti Pamilia Masuli (Dr. ken Mrs. Freddie P. Masuli) ti board meeting iti pagtaenganda iti Centro 2, Sanchez Mira, Cagayan.

Malaksid kadagiti opisial ti GUMIL Filipinas, maipaganetget pay ti itatabuno dagiti presidente/pannakabagi dagiti GUMIL Provicial Chapters. (RVA)

Ituloy a Basaen

Pasnaan 5, maangay iti Peb. 7-9; espesial a miting ti GF, Peb. 9

Maangay ti Pasnaan 5, ti maikalima nga edision ti workshop nga imatonan ti GUMIL Filipinas, ti gunglo dagiti mannurat nga Ilokano, itoy a Pebrero 7-9, 2014 iti Conference Hall ti Cagayan State University, Gonzaga, Cagayan (saan nga iti Riverview Resort, kas immuna a naipakaammo).

Panggepna a patademen ti pluma dagiti agdadamo a mannurat nga Ilokano, maiwayat ti Pasnaan babaen ti panagtitinnulong ti GF ken dagiti nadumaduma nga ahensia kas iti National Commission for Culture and the Arts, Bannawag, GUMIL Cagayan ken ti chapter daytoy a GUMIL Gonzaga, ken ti LGU Gonzaga (Cagayan) nga idauluan ni Mayor Carlito F. Pentecostes, Jr.

Iti tallo nga aldaw, ma-workshop ti gapuanan dagiti sangapulo nga agdadamo a mannurat babaen ti panangiwanwan dagiti mabigbigbig a mannurat, editor, ken kritiko nga Ilokano.

Iti sabali a bangir, maangay ti espesial a miting ti board of directors ti GUMIL Filipinas iti Pebrero 9 iti met laeng CSU, Gonzaga, Cagayan, kas impakaammo ni GF Pres. Arthur P. Urata, Sr. mainaig iti maangay a maika-46 a Nailian a Kombension ti GUMIL Filipinas inton Abril 18-20, 2014 iti Masisit Beach Resort, Sanchez Mira, Cagayan, ken mainaig iti pagtaktakderan ti gunglo iti kontrobersia iti ortograpia ti lengguahe nga Ilokano, ken dadduma pay a pakaseknan ti gunglo.

Maigunamgunam ti yaatendar dagiti amin nga opisial ti GF ken dagiti presidente dagiti GUMIL chapter iti Filipinas idinto ta maidawat ti yaawag dagiti presidente ti GUMIL chapter iti ballasiw-taaw. (Pasnaan/GF Secretariat)

Ituloy a Basaen

10 nga agdadamo a mannurat nga Ilokano, fellow iti Pasnaan 5

Sangapulo nga agdadamo a mannurat nga Ilokano ti napili nga agbalin a Fellow iti Maika-5 a Pasnaan, ti workshop dagiti mannurat nga Ilokano nga imatonan ti GUMIL Filipinas, iti pannakitinnulong ti National Commission for Culture and the Arts, Bannawag, GUMIL Cagayan ken ti chapter daytoy a GUMIL Gonzaga, ken ti LGU Gonzaga (Cagayan) nga idauluan ni Mayor Carlitos F. Pentecostes, Jr.

Napili a fellow para iti Sarita da Marie Rita M. Brillantes ti San Antonio, Candon City; Ronnie E. Aguinaldo ti Minabel, Puro Camiguin, Calayan, Cagayan ken Ridel T. Cabulisan ti Masisit, Sanchez Mira, Cagayan.

Napili met fellow para iti Daniw a Para Ubbing ni Marlyn del Rosario ti San Nicolas, Villasis, Pangasinan.

Napili met a fellow para iti Daniw da Rex T. Aquino ti Maddalero, Buguey, Cagayan; Mario S. Ascueta ti Progressive, Gonzaga, Cagayan; Michael S. Naidas ti Santa Maria, Gonzaga, Cagayan; ken Vicente R. Raras ti Minanga, Camalaniugan, Cagayan.

Napili met a fellow para iti Sarita a Para Ubbing da Anna Liza Gaspar ti Tangaoan, Piddig, Ilocos Norte ken Leah D. Manzano ti Bagani Campo, Candon City.

Babaen ti pannarabay dagiti mabigbig a mannurat, editor ken kritiko a kas kada Juan S.P Hidalgo, Jr. ken Bannawag Editor Cles B. Rambaud, ma-workshop dagiti sinurat dagiti nasao a fellow iti daytoy Pebrero 7-9, 2014 iti Riverview Resort iti Gonzaga, Cagayan.

Dagiti kameng ti Seminar-Worshop Committee ti GUMIL Filipinas ti nagpaay a secretariat ken mangimaton iti pannakaiwayat ti Pasnaan 5. (Pasnaan Secretariat)

Ituloy a Basaen

Maikatlo a Board Meeting ti GUMIL Filipinas

MAIKATLO A BOARD MEETING TI GUMIL FILIPINAS, DISIEMBRE 7, 2013. Sinangaili da GF Director Martin T. Rochina (likud, kakanawanan) ken ti kaingungotna a Teresita Rochina. Sango, agpakanawan: Aileen R. Rambaud (direktor), Reynaldo E. Andres (PRO), Sherma E. Benosa (direktor), Arthur P. Urata Sr. (presidente), Estela B. Guerrero (auditor), ken Eden C. Bulong (tesorera). Likud, agpakanawan: Freddie Pa. Masuli (direktor), Ariel S. Tabag (direktor), Mario Tejada (bise presidente), Derick Marcel F. Yabes (kameng ti GUMIL Cagayan), Roy V. Aragon (sekretario-heneral), Leonardo S. Faragan (kameng ti GUMIL Metro Manila), Cagayan Board Member Vilmer V. Viloria (direktor), ken MTR. 

Ituloy a Basaen

Pasnaan 4: Pinnitpit ken Pinnaludip, Innadal ken Innangaw

Teksto ken Rinetrato ni ROY V. ARAGON

ITAY Mayo 29-31, naangay ti maika-4 a Pasnaan, ti literary wokshop nga isaysayangkat ti GUMIL Filipinas para kadagiti kabarbaro ken/wenno agdadamo a mannurat nga Ilokano wenno agsursurat iti lengguahe nga Ilokano, iti Doña Josefa Edralin Marcos Elementary School iti Currimao, Ilocos Norte. Maisaysayangkat ti Pasnaan Workshop babaen ti ayuda manipud iti National Commission for Culture and the Arts (NCCA) ken iti pannakintinnulong ti DepEd Ilocos Norte (Currimao District), GUMIL Ilocos Norte ken ti Bannawag.

Addaan iti panggep a mangtakuat ken mangtubay kadagiti potensial a kaaduanna nga agtutubo a mannurat nga Ilokano, naipadron ti Pasnaan iti dua a nalatak a literary workshop iti pagilian—ti U.P. National Writers Worshop ken ti Silliman Writers Workshop.

Iti Pasnaan, maipasnek ti panagiinnadal ken panagkritisismo kadagiti sinurat a daniw, sarita, salaysay, bukanegan, wenno daniw a pangorona nga idatag dagiti napili a fellows a “mapitpit” iti pasnaan (anvil) tapno kas iti mapanday a buneg manipud iti mulye, mapabeggang, mapitpit ken matenneb— ken mapatadem ti pluma dagitoy babaen ti panangtarabay dagiti panelist a kaaduanna ket maibilang a bangolanen iti panagsuratan.

Iti uppat a tawenen a pannakaisaysayangkat ti Pasnaan Workshop, adu metten kadagiti naglasat iti daytoy ti nabunga ken naballigi: adu dagiti nagtultuloy nga agsurat ken nangpapino iti panagsuratda agingga a nakaipablaakdan ken nangab-abakda payen kadagiti pasalip iti panagsuratan.

Ket kas met kadagiti napalpalabas a Pasnaan (nangrugi idi 2010), agsipud ta makuna nga informal ti pannakaangay ti workshop, saan a “serioso” ken saan met a “terror” wenno nadangkok dagiti panelist, sapasap a nakuna dagiti fellow ken pati dagiti dimmar-ay nga observer a ti Pasnaan 4 ti maysa kadagiti kararagsakanen a workshop a napadasan wenno naimatanganda. Kaaduanna ngamin a naparato ti panagsinnukat dagiti fellow ken panelist iti kapanunotan wenno komento, ket nupay iti damo ket agdadanag dagiti fellows, nairuamda met laeng ti bagida ket idi kuan makiin-innangawda metten kadagiti impatoda idi damo a “nararanggas a pumitpit” a panelist.

Ket wen, adda payen dagitay matiltiliwan nga agpipinnaludip ken agiinnisem! Ala, ket saan a dakes no kas iti GUMIL adda daytay kunkunada a “magumil,” iti Pasnaan, adda met “mapasnaan”— para iti agtultuloy a pannakasaluad ken pannakaitandudo ti Literatura nga Ilokano.

Dagiti nagturpos a Fellow ti Pasnaan 4 a siraragsak a nangawat kadagiti sertipiko ti panagleppasda kalpasan ti agtallo nga aldaw a “pannakapitpitda.” Agpakanawan: Gorgonia “Aileen” B. Serrano (sarita), Florenda L. Pedro (daniw), Rhea Rose D. Berroy (daniw), Io M. Jularbal (sarita), Mercy Vergara-Yabes (daniw), Roselyn C. Campano (daniw), Rosario A. Bingayen (daniw) ken Alain F. Razalan (sarita).

Ni Ronelyn B. Ramones ti Bacarra, I.N. idi awatenna ti sertipikona a kas Outstanding Fellow ti Pasnaan 3 (2012), iti panangbayabay da Juan S.P. Hidalgo, Jr. ken GF President Arthur P. Urata, Sr.

Maysa kadagiti naragsak nga eksena iti “pinnitpitan.” Nakasango iti kamera da (agpakanawan) Cles B. Rambaud (panelist), John B. Buhay (panelist), Joel B. Manuel (panelist), Juan Al. Asuncion (panelist) ken Ariel S. Tabag (workshop director).

Panaginniliw ti dua a bangolan a mannurat nga Ilokano, da Gregorio T. Amano (guest panelist) ken Juan S.P. Hidalgo, Jr. (nangidaulo kadagiti panelist).

Inawat ni Florenda L. Pedro (a.k.a. Dumay Solinggay) ti premiona (cash ken libro a “Bullalayaw”) a kas grand prize winner iti naangay nga on-the-spot a panagsurat iti daniw para kadagiti Pasnaan 4 fellows. Agpakanawan: Ariel S. Tabag, Rey Joel B. Guerrero (nangidonar iti cash prize), Dumay Solinggay, John B. Buhay (hurado), Junley L. Lazaga (hurado), ken Roy V. Aragon (hurado).

Ni observer Rosario P. Savellano ti Sarrat, I.N. iti panangibasana iti daniwna. Saan a nairaman iti ladawan ti maysa pay nga observer, ni Ronel Jasper C. Gudoy ti Sarrat met laeng.

Iti panagleppas ti Pasnaan 4 Workshop, nagraragup dagiti fellow ken panelist para iti pakalaglagipan a ladawan a kaduada ni DepEd Ilocos Norte-Currimao District Supervisor  Elizabeth M. Raquel. Sango, nakamasngaad, agpakanawan: John B. Buhay (Panelist), Cles B. Rambaud (Panelist), ken Derick Marcel F. Yabes (Moderator). Tengnga, nakatugaw, agpakanawan: Junley L. Lazaga (Panelist), Juan S.P. Hidalgo Jr. (Panelist), Roy V. Aragon (Panelist), Ronelyn B. Ramones (Pasnaan 3 Outstanding Fellow), Supervisor Elizabeth M. Raquel, Estela Bisquera-Guerrero (Panelist), Daniel L. Nesperos (Panelist), ken Ariel S. Tabag (Workshop Director). Likud, nakatakder dagiti fellows, agpakanawan: Gorgonia B. Serrano, Florenda L. Pedro, Rhea Rose D. Berroy, Io M. Jularbal, Mercy Vergara-Yabes, Roselyn C. Campano, Rosario A. Bingayen, ken Alain F. Razalan. Saan a nairaman da Joel B. Manuel (Panelist) ken Juan Al. Asuncion (Panelist).

Malaksid kadagiti nakadamaten a tumultulong iti pannakaisayangkat ti Pasnaan, mairaman kadagiti simmaranay iti Pasnaan 4 dagiti sumaganad: dagiti mangisursuro iti Doña Josefa Edralin Marcos E/S nga idauluan ni Principal Aurea S. Austria, DepEd Currimao District Supervisor Elizabeth M. Raquel, Florentino Awardee Marlene J. Tolentino, dati a DepEd District Supervisor iti Siudad ti Batac I Rosario A. Bingayen, da agkabsat a GUMIL Maui President Arnold C. Baxa ken Judge Artemio C. Baxa, da GUMIL Oahu Advisers Ric Agnes ken Norberto D. Bumanglag, Jr., Analyn S. Domingo, Rizalena Hufana Solis ken Shalimar P. Cuadra ti GUMIL Hong Kong, ALVIYA Foundation, RFAAFIL, Saniata Publications, Zac Sarian ti Agriculture Magazine, Fernando Alonzo ken Corazon “Razi” Quiamas ti Hawaii, Alexander R. Barut ti Texas, Marichel E. Suguitan ti Hong Kong, May T. Alzate-Nunez, Estela B. Guerrero ken pamiliana, Martin T. Rochina, Vicente P. Palcong, Leilanie G. Adriano, Ludy F. Bravo, kdp.#

(Naipablaak iti Bannawag, Hulio 8, 2013 a bilang.)

Ituloy a Basaen

GF Board Meeting: Dis. 7

Maangay ti maikatlo a board meeting ti GUMIL Filipinas, ti gunglo dagiti mannurat iti Filipinas ken ballasiw-taaw, itoy Disiembre 7, 2013 (nayalud-od manipud iti Nobiembre 8), 10 A.M. babaen ti panangsangaili da GF Board Director Martin T. Rochina ken ti kaingungotna a ni Teresita Rochina iti pagtaenganda iti Brgy. Rizal, Makati City, kas kuna ni GF President Arthur P. Urata, Sr.

Mapagsasaritaan iti nasao a miting dagiti proyekto ti GF a kas iti Pasnaan 5 a maangay inton Pebrero 7-9, 2014 idiay Gonzaga, Cagayan; ti Balikas a publikasion ti gunglo; ti Tagnawa 2014 a proyekto iti panagilibro ken ti pannakaangay ti 46th GF Convention inton Abril 2014 iti Sanchez Mira, Cagayan.

Maigunamgunam ti idadar-ay dagiti amin nga opisial ken dagiti presidente dagiti GUMIL chapter.

Iti sabali a bangir, marambakan ti maika-47 nga anibersario ti GUMIL Metro Manila iti pagtaengan da GMM President Vivencio S. Baclig iti Novaliches, Quezon City itoy a Disiembre 8, 2013. Simple laeng ti selebrasion ta inkeddeng dagiti kameng ti agdonar kadagiti biktima ti bagyo a Yolanda babaen ti Philippine National Red Cross.


(Naipablaak iti Bannawag, Disiembre 9, 2013 a bilang.)

Ituloy a Basaen

DAP-AYAN 2013 (3)

Dagiti baro nga opisial ti GUMIL Filipinas nga agtakem iti 2013-2015 nga idauluan ni Arthur P. Urata, Sr. (maikadua iti kanawan). Agpakanawan: Mario T. Tejada, Bise Presidente; Roy V. Aragon, Sekretario Heneral; Estela Bisquera-Guerrero, Auditor; Martin T. Rochina, Direktor; Vilmer V. Viloria, Direktor; Eliseo B. Contillo, Direktor; Ariel S. Tabag, Direktor; Emy Amad Z. Bucaneg, Direktor; Freddie P. Masuli, Direktor; Aileen R. Rambaud, Direktor; Judge Vivencio S. Baclig (Ret.), Ex-Officio Director; ken Arthur P. Urata Sr., Presidente. Binayabay ida ni Honor Blanco Cabie, dati a GF President, a nagpaay a chairman ti COMELEC (kakanawanan). Awan iti ladawan dagiti dadduma pay nga opisial, da: Eden C. Bulong, Tesorera; Benjamin P. Pacris, Business Manager; Reynaldo E. Andres, Press Relations Officer; ken Sherma E. Benosa, Direktor. (Rinetrato ni Jennifer Aribuabo Tagavilla)

 Ti Maika-45 a Kombension Nasional ken Literary Seminar ti GUMIL Filipinas

“Agkaykaysa, Pumigpigsa” (3)

Teksto ken Ala ni ROY V. ARAGON

AGKAYKAYSA. Ken pumigpigsa. Kas ‘tay pagsasao nga, “In unity, there is strength.” No apay a kastoy ti tema ti Maika-45 a Kombension Nasional ken Literary Seminar ti GUMIL Filipinas, kayat a paneknekan ti gunglo nga iti laksid nga adda met dagiti di panagkikinnaawatan, kas normal wenno gagangay iti maysa nga organisasion, adda latta panagkaykaysa dagiti mannurat nga Ilokano. Daytoy a panagkaykaysada para iti maymaysa a panggep (ti pannakasaluad ken pannakaparang-ay ti literatura dagiti Ilokano) isu met ti mangpatpatibker latta tapno agtultuloy ti isasantak ti gunglo— ita, iti maika-45 a tawenna, ken iti masakbayan.

Wen, 45 a tawenen ti GUMIL Filipinas. Tawen 1968 idi pormal a nabangon ti gunglo a salinong dagiti immuna a nabukel a grupo wenno gunglo dagiti agsursurat iti Ilokano kadagiti probinsia.

Oktubre 19, 1968, iti Baguio Tech sadiay Siudad ti Baguio, iti okasion ti pannakapadayaw dagiti nangabak iti Salip ti Sarita nga insayangkat ti Bannawag, a naangay ti eleksion dagiti umuna nga opisial ti GUMIL Filipinas.

Dagiti nangabak iti Reynaldo A. Duque On-the-Spot Essay Writing Contest. Nagun-od ni Mario S. Ascueta, mikatlo manipud iti kanigid ti Umuna a Gunggona (yaw-awat ni Ret. RTC Judge Vivencio S. Baclig, maikadua iti kanigid a binayabay ni nagpresidente ti GUMIL Filipinas Dionisio S. Bulong, kakanigidan, ti premiona). Ni Lenita S. Baclig, maikapat manipud iti kanigid, ti nangabak iti Maikadua a Gunggona; ken Maricel S. Battung, kakanawanan, Maikatlo a Gunggona. (Teksto ken Rinetrato ni Jorge Placido)

Dagiti met nangabak iti Reynaldo A. Duque On-the-Spot Poetry Writing Contest. Umuna a Gunggona: Mario S. Ascueta (maikatlo iti kanigid), Herman S. Cardenas, Maikadua (maikapat iti kanigid) ken Danny Villena, Maikatlo (kakanawanan). Kaduada met laeng iti ladawan da Dionisio S. Bulong, dati nga Editor-in-Chief ti Bannawag ken nangimaton iti salip; ken RTC Judge Vivencio S. Baclig (Ret.). (Teksto ken Rinetrato ni Jorge Placido).

Dagiti polis a kumakanta ken musiko ti PNP RECOM 02 Band nga inkuyog ni Regional Director Rodrigo P. De Gracia a nangliwliwa kadagiti delegado babaen dagiti kanta nga Ilokano ken agdama a hits a kas iti Gangnam Style ni Psy.

Ti Gonzaga String Band a nangliwliwa met kadagiti delegado kadagiti makaduayya a samiweng.

Dagiti Senior Citizens ti Gonzaga a nangipabuya iti naisangsangayan a folk dance.

Pakalaglagipan a ladawan ti sumagmamano a delegado iti kombension. Kinagrupoda ni GUMIL Maui President Arnold C. Baxa (kakanawanan). Agpakanawan: Gladys Reyes, Leonora R. Melchor, Joel B. Manuel ken Janet Aguba ti GUMIL Ilocos Nore; ken da agina a Lani Matias Jose ken Pamela Joy M. Jose ti Gattaran, Cagayan.

Kas pananglagip, dagitoy man dagiti nagpaay a kaunaan nga opisial ti GF: Arturo M. Padua, presidente; Pelagio A. Alcantara, bise-presidente; Guillermo R. Andaya, executive secretary; Prescillano N. Bermudez, treasurer; Joven F. Costales, auditor; Pacita C. Saludes, business manager; ken Manuel S. Diaz, press information officer. Dagiti direktor: Juan S.P. Hidalgo Jr., Juan A. Alegre, Rodrigo M. Manongdo, Peter La, Julian, Virgilio E. Vives, Mauro F. Guico, Fredelito L. Lazo, ken Melita Bautista. Mamagbaga da Gregorio C. Laconsay, Dr. Godofredo S. Reyes, Dr. Hermogenes F. Belen ken Propesor Santiago Alcantara.
Sumagmamano kadagitoy a pioneers ti kameng itan ti “GUMIL Langit” (imaginary a gunglo dagiti Gumiliano ken Gumiliano nga addan iti nagkaysa a biag).

Uppat a pulo ket lima a tawen kalpasanna, iti eleksion a naangay iti Gonzaga, Cagayan, napili met dagiti sumaganad a mangidaulo iti GF iti 2013 agingga iti 2015: Arthur P. Urata, Sr., presidente; Mario T. Tejada, bise-presidente; Roy V. Aragon, sekretario-heneral; Eden Cachola-Bulong, treasurer; Estela Bisquera-Guerrero, auditor; Benjamin P. Pacris, business manager; Reynaldo E. Andres, public relations officer; dagiti direktor: Sherma E. Benosa, Emy Amad Z. Bucaneg, Eliseo B. Contillo, Freddie Pa. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Babaen kadakuada ken iti pannakikaykaysa dagiti amin a kameng ti gunglo, manamnama a mapapigsa pay ti GF, nangruna dagiti nadumaduma a chapters kadagiti probinsia, para iti pannakataginayon ken pannakapadur-as pay ti Literatura nga Ilokano ken ti pagsasao nga Ilokano.


(Naipablaak iti Bannawag, Mayo 27, 2013 a bilang.)

Ituloy a Basaen

DAP-AYAN 2013 (2)

Dap-ayan 2013: Maika-45 a Kombension Nasional ken Literary Seminar ti GUMIL Filipinas

“Agkaykaysa, Pumigpigsa” (2)

Teksto ken Rinetrato ni ROY V. ARAGON

NAKALLALAGIP ti Maika-45 a Kombension Nasional ken Literary Seminar ti GUMIL Filipinas, saan la a gapu ta inturong ket impasiarna dagiti delegado iti maysa kadagiti kamurdongan nga ili iti Amianan a Luzon, iti Gonzaga, Cagayan, ket napnekda iti sang-aw ken anasaas ti baybay ken iti litnaw ken lamiis ti karayan; ngem maysa a nangruna a malaglagip iti daytoy a panagtataripnong ken panagiinnadal ket ti banag nga ad-adu man itan ti bilang wenno ti partisipasion dagiti agtutubo a mannurat nga Ilokano.

Wen, ta kadagiti pay laeng nagpaay a panelist wenno lecturer kadagiti naangay a panel discussion, kaaduan ti maibilang nga ubbing wenno nauubbing pay. Maiduma daytoy kadagiti napalpalabas a kombension ti GUMIL Filipinas a no lecturer wenno speaker, kunam, inanamaemon ‘tay natataeng, nalaklakay wenno nabakbaket, mas senior iti edad a kas man pangipaduyakyak iti autoridad wenno ad-adu nga ammo a maisuro. Ngem kas napaneknekan manen itoy a kombension, iti panagsuratan man wenno iti panangibingay iti ammo, awanen ti makuna a lakay wenno ubing, agpapadadan.

Aw-awaten ni Jobert M. Pacnis ti Ballesteros, Cagayan ti premiona ken ni GF President Judge Baclig a kas kakaisuna a nangabak (Special Prize) iti Salip iti Sarita ti 2nd ALVIYA Literary Foundation a binangon ni mannurat iti Bannawag Alex V. Yadao ti Abulug, Cagayan ngem agnanaeden iti New York, U.S.A. Kaduada iti ladawan ni sigud a Bannawag Editor Dionisio S. Bulong, kameng ti hunta dagiti hurado. Adda iti kakanigidan ni Dr. Freddie P. Masuli a mangimatmaton iti Pasalip ALVIYA.

Ni GUMIL Metro Manila Sherilyn T. Viloria, Miss GUMIL Filipinas 2013, kalpasan ti panangisaad da Gonzaga Mayor ken Mrs. Carlito F. Pentecostes, Jr. iti koronana. Nagpaay met a konsortena ni GMM Director Virgilio C. Tabugadir.

Nakiragup ni Arthur P. Urata, Sr., Presidente ti GUMIL Cagayan ken nabotosan a baro a Presidente ti GUMIL Filipinas (2013-2015), maikapat manipud iti kanigid ken ni Mutia ti GUMIL Filipinas 2013 Sherilyn Viloria ti GUMIL Metro Manila, maikatlo manipud iti kanigid. Kaduada iti ladawan da Virgilio Tabugadir, kameng ti hunta direktiba ti GUMIL Metro Manila, a konsorte ti reyna, Jasmin Garcia ti GUMIL Gonzaga, 2nd runner-up, ken Jennifer Tagavilla ti GUMIL Ilocos Norte, 1st runner-up. (Rinetrato ni Jorge Placido)

Ni GUMIL Maui President Arnold C. Baxa (kakanawanan), kakaisuna a delegado manipud iti ballasiw-taaw a nangikagumaan iti yaatendarna iti Maika-45 a Kombension ken Literary Seminar ti GUMIL Filipinas. Kaduana iti presidential table da GUMIL Filipinas Vice-President Vilmer V. Viloria (nagtaray ken nabotosan kalpasanna a director) ken Atty. Rodrigo P. De Gracia, Regional Director ti PNP Regional Command 02 a nagpaay a naisangsangayan a sangaili ken nagsarita iti kombension.

Dagiti baro a kameng ti GUMIL Filipinas iti panagsapatada iti panangannong ni GF President Retired RTC Judge Vivencio S. Baclig. Nairaman kadakuada da Ridel T. Cabulisan, Ronelyn B. Ramones, Leonora R. Melchor, Gladys Reyes, Rhea Rose D. Berroy ken Imelda D. Toledo.

Dagiti Mutia ti GUMIL Filipinas 2013 (agpakanawan): Miss GUMIL Ilocos Norte Jennifer A. Tagavilla, 1st Runner Up; Miss GUMIL Metro Manila Sherilyn T. Viloria, Miss GUMIL Filipinas 2013; ken Miss GUMIL Gonzaga Jasmin C. Garcia, 2nd Runner Up.

Sumagmamano kadagiti kameng ti GUMIL Ilocos Norte a dimmar-ay iti kombension nga indauluan ni Elizabeth M. Raquel (sango, maikatlo iti kanigid). Nairaman iti ladawan da Marjorie Tagayona Felipe, Jennifer A. Tagavilla, Aurea S. Austria, Rosario A. Bingayen, Milagros Sagadraca, Adoracion Salantes, Janet Acoba ken Narcisa Acosta. (Rinetrato ni Jorge Placido)

Sumagmamano kadagiti kameng ti GUMIL Cagayan, ti gunglo a nangsangaili iti GF convention, a nangbantay iti registration table.

Saan met ngata a nairanrana, ngem madlaw met ti ad-adu nga nauubbing a delegado. Paneknekan daytoy ti idadar-ay dagiti agdadamo a a mannurat wenno mangrugrugi nga agsurat iti bukodda a pagsasao (Ilokano), kas koma kada Pamela Joy Jose ti Gattaran, Cagayan; Roselyn Campano ti Gonzaga, Cagayan; Rhea Rose Berroy ti Manabo, Abra; Angeluz Biz ti Sta. Teresita, Cagayan; Sherilyn Viloria ti Gattaran, Cagayan; Pearl Dacuag ti Gamu, Isabela; Ronelyn Ramones ti Bacarra, Ilocos Norte; Jennifer Tagavilla ti Siudad ti Batac; Marie Rita Brillantes ti Siudad ti Candon; kdp.

Dakkel la ketdi ti akem dagiti agtutubo iti GUMIL iti pannakaitultuloy ken pannakasalimetmet dagiti panggepna. Isu ngata nga uray kadagiti napili nga opisial ti gunglo nga agtakem iti 2013, adu kadakuada ti maibilang nga ubbing wenno naub-ubing ngem kadagiti dati nga opisial. A maysa manen a malaglagipto iti pakasaritaan ti GUMIL a sigsigud nga idadauluan wenno iwarwardas dagiti nataengan.

Mangnamnamatayo ngarud nga ad-adda a pumigpigsa ti GUMIL Filipinas ket agkaykaysa amin a mannurat nga Ilokano para iti maymaysa a panggep, ti pannakapatan-ay ken pannakaidur-as ti Literatura nga Ilokano ken ti pagsasao nga Ilokano.

(Adda Tuloyna iti Ngato)

Ituloy a Basaen

DAP-AYAN 2013 (1)

Iti panagpasangbay ni GC President Arthur P. Urata Sr. kadagiti delegado iti sardam ti umuna nga aldaw ti pasken.

Maika-45 a Kombension Nasional ken Literary Seminar ti GUMIL Filipinas

“Agkaykaysa, Pumigpigsa” (1)

Teksto ken Rinetrato ni ROY V. ARAGON


ITI maikapat a gundaway, itay Abril 19-21, naangay iti Cagayan, iti ili ti Gonzaga, ti tinawen a panagtataripnong ken panagiinnadal dagiti mannurat nga Ilokano, ti Maika-45 a Kombension Nasional ken Literary Seminar ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, babaen ti tema nga “Agkaykaysa, Pumigpigsa.” Immuna idi 1991 a naangay iti Aparri; sa idi 2003 iti Peñablanca; ken idi 2006 iti Lal-lo.

Iti daytoy a tawen, naangay ti kombension iti napabaro a People’s Gymnasium ti Gonzaga nga adda laeng iti abay ti napabaro ken napapintas a munisipio, babaen ti panangsangaili ti gobierno lokal ti Gonzaga nga idauluan ni Mayor Carlito F. Pentecostes Jr., iti panangayuda dagiti nadumaduma a lokal nga opisina ti ili babaen ti panangiwardas ni MPDC Head Emy Amad Z. Bucaneg, ken babaen ti GUMIL Cagayan nga idauluan ni Arthur P. Urata Sr., ti GUMIL Gonzaga nga idauluan ni Herman S. Cardenas, ken ti GUMIL Filipinas nga idauluan ni retirado nga RTC Judge Vivencio S. Baclig.

Naidagus dagiti ag-200 a delegado a naggapu iti nadumaduma a GUMIL chapters iti pagilian ken iti ballasiw-taaw, iti nalatak a Gonzaga River View Resort (sigud nga am-ammo a kas STR wenno Sirok ti Rangtay) iti igid ti nalatak met laeng a Wangag River iti Brgy. Pateng ti nasao nga ili.

Ni Mayor Carlito F. Pentecostes Jr. iti panangpasangbayna kadagiti delegado. Nagyaman ti mayor iti pannakapili ti “nanumo nga ili ti Gonzaga” a mangsangaili kadagiti “agkakasiglat a mannurat nga Ilokano.” 

Ni Atty. Rodrigo P. De Gracia, Regional Director ti PNP Regional Command 02, iti panagsaritana a kas naisangsangayan a sangaili iti kombension. Dinayawna ti kinaaktibo dagiti mannurat nga Ilokano nga aggugunglo ken agkakaysa para iti idudur-as ti literatura a Saluyot; ken linagipna ti kinaubingna a naglaklako met idi iti Bannawag tapno adda nayon ti gastuenna nga agbasa. Tubo iti Sta. Teresita, Cagayan, maysa a patneng nga Ilokano ti heneral.

Dagiti nangabak iti Maika-15 a Salip iti Sarita a Para Kadagiti Agdadamo a Mannurat nga inisponsoran ti AMMA Foundation Literary Awards. Ni GF President Retired Judge Vivencio S. Baclig ti nangyawat kadagiti premio kada Marichel E. Suguitan ti Solano, Nueva Vizcaya a nangabak iti Umuna a Gunggona (imbagian ni Marie Rita Brillantes); ken Ronelyn B. Ramones ti Bacarra, I.N, Maika-2 a Gunggona. Binayabay ida ni Bannawag Poetry Editor Ariel S. Tabag a nagpaay a maysa kadagiti hurado. Saan a nairaman iti ladawan ti nangabak iti Maika-3 a Gunggona a ni Avelino B. Felicitas, Jr. ti Abra ngem agindegen iti Waipahu, Hawaii.

Dagiti nangabak iti Salip iti Sarita a Para Ubbing ti 11th RFAAFIL. Manipud kanawan: Ronelyn B. Ramones ti Bacarra, Ilocos Norte, Maika-5 a Gunggona; Crisostomo M. Ilustre ti Bauang, La Union, Maikapat;  Cles B. Rambaud ti Pinili, I.N., Maikatlo; ken Noli S. Dumlao ti Paoay, I.N., Maikadua (imbagian ni Simeon C. Berroy). Nairaman da GF President Judge Baclig, nagyawat iti premio, ken Freddie P. Masuli, nagiwaragawag. Saan a nakadar-ay ti nangabak iti Umuna a Gunggona, ni Leah D. Manzano ti Siudad ti Candon.

Dagiti nangabak  iti Salip iti Daniw a Para Ubbing ti 11th RFAAFIL. Agpakanigid: Johmar R. Alvarez ti Ballesteros, Cagayan, Maikadua a Gunggona; GF President Judge Baclig; Ronnie Es. Aguinaldo ti Calayan, Cagayan, Maikatlo; Jobert M. Pacnis ti Ballesteros, Cagayan, Maikapat, ken Benjamin P. Pacris ti Laoag City, Maikalima. Saan a nakadar-ay ni Agustin DC. Rubin ti San Ildefonso, I.S. ngem agnaeden iti Zambales a nangabak iti Umuna a Gunggona.

Dagiti agdadamo a mannurat nga inisponsoran ti RFAAFIL ti libre a rehistrasionda iti GF Convention, iti panangawatda iti sertipiko ken RFAAFIL shirt-da. Agpakanigid: Ronelyn B. Ramones ti Bacarra, I.N.; Roselyn Carillo Campano ti Gonzaga, Cagayan; Rhea Rose D. Berroy ti Manabo, Abra; Sherilyn T. Viloria ti Gattaran, Cagayan; ken Pearl Lovedyn A. Dacuag ti Gamu, Isabela.

Iti pannakapadayaw dagiti nangabak iti Salip iti Daniw a Para Ubbing ti 2013 Prof. Honor Blanco Cabie Premio Iti Naisurat Iti Literatura Ilokana (Cabie PINILI). Agpakanigid: Herman S. Cardenas ti Gonzaga, Cagayan, Maikatlo a Gunggona; Efren Inocencio ti Batac, I.N., Honorable Mention (imbagian ni Joel B. Manuel), GF President Judge Baclig, chairman ti hunta dagiti hurado; Ariel S. Tabag, kameng; Martin T. Rochina, kameng; Rose Cabie; Edith Cabie Tabangay; ken Prof. Honor Blanco Cabie. Saan a nairaman iti ladawan ni Jesusa Leticia Lagda ti Paoay, I.N., Honorable Mention. Awan ti nangabak iti Umuna ken Maikadua a Gunggona.

Ni sigud a Bannawag Literary Editor ken GF President, nobelista Jose A. Bragado iti plenary lecture-na maipapan iti “Ti Mannurat ken ti Gimong.” (Rinetrato ni Imelda Duque Toledo)

Ni Neyo Mario E. Valdez kabayatan ti panaglektiurna maipapan iti “Panagsurat iti Salaysay Maipanggep iti Politika.”

Ni Dr. Freddie P. Masuli iti lektiurna iti “Panagsurat iti Sarita Maipanggep iti Kagimongan.” Kaabayna ni GF Vice-President Vilmer V. Viloria a nagpaay a kas moderator.

Ni Johmar R. Alvarez, lecturer iti “Panagsurat iti Daniw a Para Ubbing.”

Ni sigud a GF President Elizabeth Madarang-Raquel iti panaglektiurna maipapan iti MTB-MLE iti “Umuna a Tawen: Dagiti Karit ken Implementasion.” (Rinetrato ni Imelda Duque Toledo)

Ni Bannawag Managing Editor Cles B. Rambaud iti panangilawlawagna iti lecture-na maipapan iti “MTB-MLE iti Umuna a Tawen: Karit iti Panagaramid iti Materiales.”

Iti Panel Discussion maipapan iti Ni Mannurat ken ti Kamalig ti Kurditanna. Agpakanawan: Joel B. Manuel, panelist iti maipapan iti “Speculative Fiction ken Graphic Fiction iti Ilokano”; Mario A. Tejada, moderator; Juan Al. Asuncion, panelist iti “Dagiti Lima a Biddut Dagiti Agdadamo a Mannurat.”

Iti Panel Discussion maipapan iti Panagsurat iti Tiempo ti Rebolusion iti Social Media. Agpakanawan: Sherma E. Benosa, panelist iti maipapan iti “Panangitandudo iti Lengguahe ken Literatura”; Roy V. Aragon, panelist iti maipapan iti “Ni Mannurat nga Ilokano ken ti Social Media”; Ariel S. Tabag, panelist iti “No Ania ti Maal-alam iti Independent Publishing” ken “Dagiti Potensial ti E-book Publishing”; ken Freddie P. Masuli, moderator. (Rinetrato ni Imelda Duque Toledo)

Pannakaited ti Certificate of Appreciation kadagiti nagpaay a Lecturer-Panelist iti Panel Discussions. Agpakanawan: Reinerio R. Alba, pannakabagi ti National Commission for Culture and the Arts (NCCA); GF President Judge Vivencio S. Baclig; Aileen R. Rambaud, lecturer (“Panagsurat iti Sarita a Para Kadagiti Ubbing”); ken GC President Arthur P. Urata Sr. (Rinetrato ni Imelda Duque Toledo)

Iti met pannakaited ti Certificate of Appreciation ken ni  Reynaldo E. Andres, lecturer (“Panagsurat iti Salaysay a Kas Panguartaan”; GF President Judge Vivencio S. Baclig; ken GF Vice President Vilmer V. Viloria. (Rinetrato ni Imelda Duque Toledo)

Naiwayat ti pasken babaen pay ti grant manipud iti National Commission for Culture and the Arts (NCCA) a kas pangrambak iti “Bulan ti Literatura Ilokana” iti kada Abril kas sagudayen ti Proclamation No. 26, s. 2001 nga impaulog ni Presidente Gloria Macapagal Arroyo.

Mairaman kadagiti naaramid iti agtallo-nga-aldaw ken agdua-a-rabii a kombension ti lektiur iti panagsurat, pannakapadayaw dagiti nangabak a mannurat kadagiti nadumaduma a salip iti panagsurat, pannakapili ti Mutia ti GUMIL Filipinas 2013, panagsapata dagiti baro a kameng ti gunglo, ken ti eleksion ti baro a grupo dagiti opisial ti gunglo nga agtakem iti 2013-2015.

(Adda Tuloyna iti Ngato)

(Naipablaak iti Bannawag, Mayo 13, 2013 a bilang.)

Ituloy a Basaen

Iti Maikadua a Board Meeting ti GUMIL Filipinas

ITI MAIKADUA A BOARD MEETING TI GUMIL FILIPINAS, gunglo dagiti mannurat nga Ilokano iti pagilian ken iti ballasiw-taaw, iti panangsangaili da agkaingungot a Rey ken Estela Bisquera-Guerrero, mannurat iti Bannawag ken auditor ti GUMIL Filipinas, iti pagtaenganda iti Tuding, Itogon, Benguet idi Agosto 24, 2013. Sango, agpakanawan: Roy V. Aragon (sekretario-heneral), Vilmer V. Viloria (direktor), Dionisio S. Bulong (adviser), Eden Cachola-Bulong (tesorera), EBG, ken Freddie Pa. Masuli. Likud, agpakanawan: Pedrito Sanidad, Emy Amad Z. Bucaneg (direktor), Arthur P. Urata, Sr., (presidente), Ariel S. Tabag (direktor), Rogelio T. Marquez (nangibagi ken ni Joey Guzman a presidente ti GUMIL Abra), Ernesto Bisquera, ken Eliseo B. Contillo (direktor). Iggem ni Tabag ti kopia ti librona nga “Ay, ni Reberen!” a nayalnag iti nasao a miting. (Ena Macabunga Viloria)

Ituloy a Basaen