Bul-ul: Dios Ti Ani Iti Ifugao

Ti bul-ul (nakatakder ken nakatugaw), iti daan nga Ifugao, isu ti pisikal a ladawan ni Maknongan (ti Dios dagiti nagkauna nga Ifugao) a mangibagi met iti maysa a saad a kas mangaywan kadagiti apit a pagay manipud kadagiti payo wenno natukadtukad a kataltalonan ti maysa a kaamaan nga Ifugao.

Bucaneg Awardee Cris Ilustre, 74

Lima nga aldaw kalpasan a naipakaammo kenkuana nga isu ti napili a kakaisuna a 2014 Pedro Bucaneg Awardee ti GUMIL Filipinas, pimmusay ni beterano a mannurat Crisostomo M. Ilustre iti pagtaenganda iti Bantay, Ilocos Sur idi Marso 26.

Maika-46 a Nailian a Kombension

Angayen ti GUMIL Filipinas (GF), ti kadakkelan a gunglo dagiti mannurat nga Ilokano iti sangalubongan, ti Maika-46 a Nailian a Kombension ti GF iti daytoy Abril 18-20, 2-14 iti Cabicungan Inn, Centro 05, Claveria, Cagayan (nayakar manipud iti Sanchez Mira, kas immunan a naipakaammo).

Dagiti Grantee iti 2013 National Book Development Trust Fund

Napili da Sherma E. Benosa, Linda Lingbaoan-Bulong ken Ariel S. Tabag kadagiti a grantee iti nobela nga Ilokano ti 2013 National Book Development Trust Fund.

Dagiti baro nga opisial ti GUMIL Filipinas

Dagiti baro nga opisial ti GUMIL Filipinas nga agtakem iti 2013-2015

5th Pasnaan Literary Workshop ti GUMIL Filipinas, silulukaten

Dagiti fellows ken panelists ti Pasnaan 4.

Saturday, November 30, 2013

5th Pasnaan Literary Workshop ti GUMIL Filipinas, silulukaten

Dagiti fellows ken panelists ti Pasnaan 4: Nakamasngaad, agpakanawan: Roy V. Aragon (Panelist), Daniel L. Nesperos (Panelist), John B. Buhay (Panelist), Ariel S. Tabag (Workshop Director), Junley L. Lazaga (Panelist), Joel B. Manuel (Panelist), ken Jual Al. Asuncion (Panelist). Nakatakder, agpakanawan: Reynaldo E. Andres (Moderator), Juan S.P. Hidalgo Jr. (Panelist), Alain F. Razalan (Fellow, sarita a para ubbing), Rosario A. Bingayen (Fellow, daniw a para ubbing), Mercy Vergara-Yabes (Fellow, daniw), Rhea Rose D. Berroy (Fellow, daniw), Florenda L. Pedro (Fellow, daniw), Gorgonia B. Serrano (Fellow, sarita), Roselyn C. Campano (Fellow, daniw), ken Ronelyn B. Ramones (Outstanding Fellow ti Pasnaan 3). Adda iti likud da Arthur P. Urata Sr., GUMIL Filipinas President; ken Io M. Jularbal (Fellow, sarita). Saan a nairaman da Cles B. Rambaud (Panelist), Estela Bisquera-Guerrero (Panelist) ken Derick Marcel F. Yabes (Moderator).


5th Pasnaan Literary Workshop ti GUMIL Filipinas, silulukaten


Agaw-awaten ti GUMIL Filipinas, babaen ti komite ti Seminar-Workshop iti aplikasion iti Pasnaan, ti workshop iti panagsurat para kadagiti agdadamo a mannurat iti Ilokano, para iti Pasnaan 5 a maangay inton Pebrero 7-9, 2014 iti Riverview Resort, Gonzaga, Cagayan.

Pagtitinnulongan daytoy nga iwayat ti GUMIL Filipinas, GUMIL Cagayan, Bannawag, ken dadduma pay nga ahensia, ken dagiti mannurat nga Ilokano.

• Silulukat ti workshop kadagiti agdadamo a mannurat iti Ilokano. Kayatna a sawen, mabalin nga agaplay dagiti saan nga Ilokano ngem makapagsurat iti Ilokano. Maibilang met nga agdadamo ti autor no saan pay a nakaipablaak iti Bannawag iti nasursurok ngem tallo a sinurat iti benneg (genre) a sumalianna. Saan a kualipikado dagiti nakadar-ayen kadagiti nailian a workshop ken dagiti nakapasa kadagiti immunan a serye ti Pasnaan ngem saan a dimmar-ay wenno nakadar-ay.

• Nasken nga orihinal, ken saan pay a naipablaak ti idatag a sinurat. Nawaya ketdi ti autor a mangpili iti tema.

• Maikompiuter dagiti sinurat—  para iti sarita, iti doble espasio a letter sized a coupon bond iti 12 points Times New Roman. Single spaced laeng dagiti maidatag a daniw, ken daniw a para ubbing.

• Iti benneg ti sarita ken sarita a para ubbing, sagdudua a gapuanan ti nasken nga idatag ti autor. Maysa laeng ketdi ti ma-workshop. Iti met benneg ti daniw, nasken a mangidatag ti autor iti uppat a gapuananna. Dua met kadagitoy ti ma-workshop.

• Agatiddog ti sarita iti 10-20 panid. Saan a makedngan ti kaatiddog ti sarita a para ubbing. Iti daniw a para ubbing, agatiddog iti tallo nga estansa a tunggal estansa, addaan iti uppat a linia; ken addaan iti rukod ken rima dagiti linia. Saan a makedngan ti kaatiddog ti daniw.

• Ti laeng parbo a nagan ti autor ti agparang iti sinurat.  Ipatulod ti soft copy ti sinurat iti asseng,tabag@gmail.com iti di naladladaw ngem alas dose iti rabii ti Nobiembre 30, 2013.

• Dua a file ti maipatulod: ti sinurat ken ti dokumento a naglaon iti paulo ti sinurat, parbo ken pudno a nagan ti autor, kompleto nga adres ti pagtaengan, pagtrabahuan wenno pagbasbasaan, agraman numero ti telepono wenno selpon, ken bionote ti autor.

• Agdalan dagiti sinurat iti panagarisit dagiti kameng ti komite ti Seminar-Workshop ti GUMIL Filipinas.

• Mapakaammuan dagiti autor dagiti mapili a gapuanan babaen ti e-mail ken/wenno awag iti selpon.

• Sangapulo a fellows ti mapili ken maikkan iti gundaway a ma-workshop dagiti sinuratda: 3 iti sarita, 3 iti daniw, 2 iti sarita a para ubbing, 2 iti daniw a para ubbing.

• Dagiti mapili a fellows, maipaayan iti libre a plete nga agpapan ken agawid, libre nga akomodasion ken sangkabassit nga honorarium.


PASNAAN SECRETARIAT 2013-2015:
Ariel S. Tabag  (Workshop Director)
Sherma E. Benosa (GF Seminar Workshop Committee Chairman)
Reynaldo E. Andres (Workshop Moderator)
Freddie Pa. Masuli (Workshop Moderator)
Estela B. Guerrero (Souvenir Mag Coordinator)
Arthur P. Urata (Ex-Officio Member)

Friday, November 29, 2013

Dagiti Lima a Kangrunaan a Biddut Dagiti Agdadamo a Mannurat

Ni JUAN AL. ASUNCION

IDI damomi ti agsurat, kunami a nalaka laeng ti agputar ta pampandaganmi nga amin a makita ken mangngeg iti aglawlaw mabalin a suraten. Kangrunaan ditan ti tsismis a naitsismis iti tsismosa a kaarruba.

Napatalgedan dayta a pammatimi idi naipablaak a dagus iti Bannawag ti immuna a sinuratmi a sarita nga imbasarmi iti agap-apa a dua a lallakay a kapurokanmi. Tallo a bulan laeng ti napalabas kalpasan ti panangibusonmi, rimmuaren! Naglaingkamin!

Sabagay nga impatulodmi iti publikasion ti nasao a sarita, impabasami kadagiti kasinged ken kaarrubami nga ammomi nga agbasbasa iti Bannawag. Awan ti mannurat kadakuada— ta abus ta kabutengmi dagiti mannurat idi, awan pay mannurat iti lugarmi.

Nagsuratkami manen. Iti dayta a gundaway, ad-adun ta kayatmi a pangasen dagiti para basami. Ngem idi mabasada dagidi sinuratmi, nagbalinda met amin nga umelen! Awan metten ti mayat a mangsungbat iti saludsodmi a “Napintas met laeng?”

Ania ngarud, saan a naipablaak dagidi a sinuratmi. Saanmi nga impatulod iti Bannawag. Nagtalinaedda iti kartonmi dagidi a manuskrito, agingga nga idi manmanokamin nga agawid ta agtrabahokamin iti Bannawag, imbelleng ti dakkelmi a babai.

Bayat ti panagpaaymi a Proofreader iti Bannawag, inad-adalmi dagiti naedit a manuskrito a maiggamanmi— ti proofreader ti pagtungpalan dagiti amin a rummuar iti magasin. Intultuloymi ti nagam-amiris agingga a dakamin ti akin-iggem iti benneg ti Literatura. Ket natakuatanmi a no impatulodmi dagidi a sinuratmi, saan koma a naipablaak. Mabalin nga imbatbabatbat wenno imbaltobaltog pay ketdi koma ti Apo Editor ta nadadael ti orasna a nangbasa. Aglalo pay ta idi impatulodmi daydi immuna a sinuratmi, imbusonmi nga awan kaduana.

Ngem adda napaneknekanmi: Pudno gayam a mabalin a suraten ti amin. Ngem saan a mabalin nga isurat amin!  No apay, ilawlawagminto.

Iti panangad-adalmi kadagiti manuskrito a maipaima wenno maipatulod kadakami babaen ti internet, adda lima a kangrunaan a nadlawmi a pagkabsiwan, pagkapsutan wenno iti nalawlawag a panangisao, masansan a pagbiddutan dagiti agdadamo wenno agngayangay a mannurat.


1. Panagpili iti Karakter

Kas nasaomin, mabalin a suraten ti amin. No naitikleb ni Maria, addan mabalin nga istoriaen.

Naitikleb laeng, istorian, kunayo?

Wen, a, apay ketdin a saan?

Kas pagarigan, saludsodentayo. Apay ngamin a naitikleb ni Maria?

Tumanaliaw ngamin nga agtartaray.

Ket apay ngamin nga agtartaray?

Kamkamaten ni Kardo a lakayna ta kayat a patayen daytoy.

Apay a kayat a patayen ni Kardo?

Natiliwanna ida ken Mario nga agay-ayam idiay kasabaan.

Kalpasan dagita a saludsod, agdadarisonen dagiti saludsod. Istoria daytan.

Ngem asino ngamin ni Maria? Nasken nga am-ammuentayo ta isuna ti nakaipuonan ti amin nga istoria. Isuna ngarud ti umuna nga ikkantayo iti importansia.

Naunget kadi ni Maria? Nakarit? Nasingpet? Dakkel a babai wenno bassit? Nakuttong wenno nalukmeg? Ulidan nga asawa? Taga-ano? Sadino a dimmakkel?

Ket ni Kardo, asino met?

Nabaked? Nakuttong? Mammartek? Mammallot? Mannakiapa kadi? Mano ti tawenna? Asino ken ania ti katatao dagiti dadakkelna? Ken dadduma pay.

Iti ababa a pannao, am-ammotayo kadi met laeng a nasayaat ida?

Daytoy a paset ti panangisagana iti suraten ti nakitami a kangrunaan a pagbiddutan dagiti agdadamo nga agsurat. Siguro, ipagarupda a gapu ta addan karakterda, adda metten istoriaenda. Ipagarupda a no ikkandan iti parikut a solbarenna, addan sarita wenno nobelada. Ngem saan a kasta ti kalakana.

Iti bukodmi a panirigan, ditoy a mangrugi nga agplano ti maysa a mannurat— iti panagpili iti karakter. No koman iti pelikula, isu daytoy daytay kunada a casting. Masaludsod dagitoy: “Asino nga artista ti nasken nga agbida? Asino met ti agkontrabida? Asino dagiti supporting actors?”

Saan a gapu ta nalaing ken nataer ti karakter, napintasen ti suraten. Kasta met iti pelikula. Saan a gapu ta nalaing ti bida, napintas metten ti pelikula. Nasken a pilien dagiti karakter a maibagay iti kayat a suraten ta dita ti tulbek ti panagballigi ti suraten. Saan a basta mangparnuay lattan iti karakter ket kunaen nga isun ti bida. Saan a mabalin a kastoy ta amangan no ti bidam ti agparang a kontrabida. Ken no saan, mapilpilit ti estoria ket pagparikutan pay ti panangileppas.

Kinapudnona, uray ti dadduma kadagiti immun-unan a nagsursurat ngem dakami, pasaray malipatanda daytoy. Basta nakapanunotdan iti karakter, suratendan. Awanen daytay pamiliarisasion a makuna.

Adu kadagiti maaw-awatmi a manuskrito ti saan nga umisu dagiti karakterna isu a ti la pagturturongan ti istoriada.

Kasano ngamin ti panagpili iti karakter?

Alaentayo a pagarigan ni Maria. No pinarnuaytayo a naunget, nakarit, mannakiapa, dakkel a babai ken naggapu iti pamilia a saan a naurnos ti panagbiagna, wenno dimmakkel iti disso nga apon dagiti nainlubongan a bambanag, mabalin a maaramidna ti makiabig. Ngem gapu ta nakarit ken mannakiapa, saan a mabalin a basta pagtarayen lattan a di man laeng lumaban iti asawana uray pay isuna ti nagbasol ta dayta ngarud ti indakdakkelna.

Ni Kardo, no napeklan nga ander sa pay la bassit ken kanayon a matiktiknolan, kas man la dina maitured a kamaten a papatayen ni Maria uray pay nakitanan a luklukuenda ta inadipen ti buteng. No agrebelde dagitoy a klase ti tattao, agkutida iti wagas a di saanen a makabales pay ti subbotenna. Sikap ti pagarienda.

No kasdiay ti mapasamak, biddut a karakter da Kardo ken Maria.

Isu a nasken unay a pilien a naimbag dagiti karakter.  Ibagay dagiti garawda maibasar iti kabaelan ken kababalinna, a saan ket a babaen dagiti pasamak.


2. Panagpili iti Eksena wenno Pasamak

Nadakamatmi a “mabalin a suraten ti amin, ngem saan a mabalin nga isurat amin.”

Kunada a naibasar iti pudno a biag dagiti sarita. Pudno. Ngem adda dakkel a paggidiatanda.

Iti sarita, dagiti laeng napipintas ken nakalalagip a pasamaken dagiti karakter ti rumbeng nga isurat. Dagiti laeng makatulong iti pannakapapintas ti estoria ti ilanad. Saan nga isu amin nga aramiden ti karakter. Pilien laeng.

Kas pagarigan, napan nagdigos idiay karayan ti karakter, saanen nga ibaga amin nga aramidenna. Saanen a simpuonen manipud ipapanawna iti balayda, agingga iti panakaitibkolna iti namindua wenno panagpangresna wenno ania pay nga inar-aramidna iti dalan agingga a nakadanon iti karayan, sa naguyos sa nagkudkod, sa etc. etc. No saan a makaidur-as iti istoria dagitoy, baybay-anen. Ta no saan, mangaramidka laengen iti diary.

Ngem, ne, uray iti diary ket saan a maipan amin nga inar-aramid!

Dagiti laeng nasken ti dakamaten iti sarita. Kas pagarigan, no nadakamat ti pannakaitibkol ti napan iti karayan, nasken nga addanto mapasamak iti nakaitibkolanna wenno iti asideg daytoy. Kasta met iti panagiladawan wenno deskripsion iti maysa a lugar. Iladawan laeng no kasapulan. Ti napan iti karayan, no dinillawna ti kinasamek ti agsumbangir nga igid ti dalan, ti kaadda dagiti dadakkel a bato a mabalin a paglemmengan, wenno ti kaadda ti waig, wenno ania pay ditan a makitkitana, masapul nga addanto mapasamak dita—kas koma iti panagtambang wenno panagrames, wenno dita ti pagkamangan dagiti kamkamaten ti no asino, kdpy.

Iti ababa a pannao, nasken nga agkakabit dagiti ilanad a pasamak. No awan pakainaiganna iti sabali, di koman sayangen nga ikkaten.

Dagiti dadduma a maaw-awatmi a sarita, kastoy ti kaaduan sakitda. Pagtaraytarayen  lattan ti autor dagiti karakterna. Mailadawanna amin a di mangan-ano. Ket nakaat-atiddog ti sinurat! Ngem no naikkaten dagiti di kasapulan, nakaab-ababan. Ken kaaduanna, saan payen a makatakder a sarita ta awan metten natda.

Agasem ta kasla agbuybuyaka iti pelikula a gubat ngem dagiti met matmaturog, aglutluto ken mangmangan a soldado ti kaaduan a naipokus sa iti kamaudiananna, nakilabanda ket nalpasen.

Dagiti nangabak iti Maika-15 a Salip iti Sarita a Para Kadagiti Agdadamo a Mannurat nga inisponsoran ti AMMA Foundation Literary Awards. Ni GF President Retired Judge Vivencio S. Baclig ti nangyawat kadagiti premio kada Marichel E. Suguitan ti Solano, Nueva Vizcaya a nangabak iti Umuna a Gunggona (imbagian ni Marie Rita Brillantes); ken Ronelyn B. Ramones ti Bacarra, I.N, Maika-2 a Gunggona. Binayabay ida ni Bannawag Poetry Editor Ariel S. Tabag a nagpaay a maysa kadagiti hurado. Saan a nairaman iti ladawan ti nangabak iti Maika-3 a Gunggona a ni Avelino B. Felicitas, Jr. ti Abra ngem agindegen iti Waipahu, Hawaii. Ti AMMAFLA ti kaanduran a pasalip iti panagsurat iti sarita para kadagiti agdadamo, no kabayagna ti pagsasaritaan. Itoy a tawen, maysa kadagiti kategoria ti kallukat a Mayor Pentecostes Awards ti salip iti sarita para kadagiti agdadamo. Iti biang met ti Bannawag, dina sirsirigen ti mannurat kas agdadamo no di ketdi tingitingenna ti sarita mismo no maikari a maipablaak kas sarita. (Rinetrato ni Roy V. Aragon)



3. Panagisagana iti Manuskrito

Iti benneg ti teknikal, adda tallo a banag a nadlawmi a pagkabsiwan dagiti agdadamo a mannurat. Ania dagitoy? Maysa ti panagisagana iti manuskrito.

No ahenteka iti maysa a produkto, ania ti aramidem tapno makalakoka? Siempre, arkosam ti produktom iti napintas. Daytay makaay-ayo. Daytay awan ti makuna ti pangidiayaam no di ket “Wow!”

Kasta koma met ti panunotentayo iti panagisaganatayo iti manuskrito. Ania dagiti wagas nga aramiden tapno di makapagsaan ni Apo Editor?

Umuna, ammuentayo dagiti pagalagadan ti publikasion a kayattayo a pangipatulodan kadagiti sinurattayo tapno iti kasta, al-alisto a madlawnatayo ni Apo Editor. Siempre, no agtungpalka iti kayatda, agparparang nga adda met ammom maipapan iti publikasion. Nasayasayaat dayta ngem daytay nairuamen iti publikasion ngem agparparang nga awan ti ammona. Dina ammo a dayta ti pakaarusanna ta no adu ti obra ni Apo Editor, unaenna la ketdi a basaen ‘tay nasayaat ti pannakaisaganana.

Iti Bannawag, nupay ipagpaganetgetmi a maipatulod koma dagiti sinurat babaen ti e-mail, adda latta met dagiti mangibuson. Ket kaaduan kadagitoy ti saan nga umno ti pannakaisaganana nangruna dagiti maidalan iti koreo.

Maibalakad a marugian ti sinurat iti katengngaan ti umuna a panid, addaan iti aglawlaw a margin a maysa a pulgada, ken maimakinilia iti dua nga espasio. Maaramid daytoy tapno adda pagsuratan ti mangedit. Agusar met koma iti 12 a font size a Book Antiqua wenno Times New Roman dagiti agipatulod iti e-mail.

Pagdaksanna, addada dagiti maipatpatulod a sinurat nga iti kinainut ti autor iti papel, saanen a nangibati iti espasio iti uray ania a sulina. Adda met dagiti single space, ken nakaad-adu ti kuringkuringna.

Dagiti met ag-e-mail, adda pay nagusar iti 20 points. Nakadaddadakkel, kakasla mata ti nuang a kunami idiay Sarrat. Ti adatna, in-paste-na pay imbes nga in-attach-na. No apay a maymayat ti mai-attach, gapu ta mapukaw ti formatting ti nai-paste. Ket mangibayag iti panagedit.

Saan met ketdi a ti pannakaisagana ti manuskrito ti kangrunaan a pagbatayan ti editor iti ipablaakna. Ngem no agikamkamakam ken adu ti trabahona, unaenna la ketdi a piduten dagiti manuskrito a nasayaat ti pannakaisaganana ket ipaigidna dagiti dadduma.

Isu a nasken nga agbalinka a responsable a mannurat. Sakbay nga ipatulodmo ken ni Apo Editor ti sinuratmo, siguraduem a nasayaat ti pannakaisagana ti manuskritom. Basaem a nalaing ket uray dagiti ‘saggabassit’ a biddut iti spelling, aturem. Ipakitam a maseknanka iti sinuratmo. Ta no saan, anianto la ketdin ken ni Apo Editor?


4. Panagisumitir iti Publikasion

Maipalagip manen daydi immuna a sinuratmi a kunami nga impatulodmi nga awan a pulos kaduana. Kayatmi a sawen ditoy, saan a napakuyogan iti uray sangkabassit la a surat.

Ngem rimmuar a dagus. Isu ti pagkunaanmi a nagasat unay.

Iti panagpapaaymi a kas editor, matakuatanmi a maysa a sapsapulen ti editor ti surat a kalukon ti manuskrito. Ket makapadismaya, ngem manmano, mairaman ditoy dagiti dadduma a nabayagen nga agsursurat, ti makalagip a mangikur-it wenno mangi-type iti uray sangkabassit laeng a mensahe.

Ania ngarud ita ti aramiden ni Editor iti naawatna a manuskrito?

Ipempenna? Basaenna? Kritikarenna? Wenno ania?

Adda maysa nga editor nga am-ammomi nga agkuna a dina ipabpablaak dagiti maaw-awatna a sinurat nga awan ti kakuyogna a surat.

Ti rasonna: Amangan kano no agriri ti autor no ipablaakna. Ta saan kano met nga imbaga ti autor a para pablaak ti impatulodna. Amangan kano no kayat laeng nga ipannakkel ti autor ti sinuratna. Insulto kano pay iti editor ti kaawan mensahe ti nagipatulod.

Mabalin nga agang-angaw laeng ti kunkunami nga editor.

Ngem kinapudnona, dakkel a ragsak ti editor ti makabasa iti uray kaaababaan laeng a mensahe manipud iti autor a mangibagbaga nga impatulodna ti sinuratna a para publikasion.


5. Lengguahe

Sakbay a rugian ti agsurat, saludsoden iti bagi: “Ania kadi ti lengguahe nga usarek?”

Ingles kadi? Tagalog? Ilokano? Wenno ania?

Ania man ti napilim, nasken a kabisadom, nasken a mamastermo, no kayatmo ti agsurat iti dayta a lengguahe. Ta no saan, kasla agkamkammelkan iti tukmem wenno dikya iti kapuskolan ti bisil wenno darat. Wenno saan, awan dumam iti maysa a pukol.

Iti bukodmi a panirigan, ti lengguahe ti kangrunaan nga armas iti panagsurat. Ket no awan armasmo, kasano ngarud a mangabakka? Isu a biddut no agsuratka bassit ti pamalpalatpatam iti lengguahe nga usarem.

Ti panagsurat, kasla panagay-ayam iti balikas. Ngem no kurang ti ammom iti lengguahem, agparang a kawaw dagiti imahe a kayatmo a yakar kadagiti agbasbasam. Ta imbes nga ibagam iti maymaysa a balikas, masapul pay nga ilawlawagmo no ania daytoy.

Adu dagiti agdadamo a mannurat iti Ilokano a nakurang ti ammoda iti lengguaheda. Ken uray dagiti dadduma a nangab-abaken kadagiti pasalip, addada dagiti agkarkarawa. Ngem no ipasnekda laeng koma nga adalen ti lengguaheda agingga a mamasterda, asino pay ti makaabak kadakuada iti panagsuratan?—O


(Naipresentar iti Maika-45 a Nailian a Kombension ken Seminar-Workshop ti GUMIL Filipinas idi Abril, 2013 iti Gonzaga, Cagayan.)

Thursday, November 28, 2013

Dagiti Mannurat nga Ilokano

Inurnong ni ARIEL S. TABAG

PANGRUGRUGIAN daytoy a listaan. Naadaw dagitoy a bionote manipud kadagiti proyekto a libro a nakairamanan daytoy numo. Saan a limitado kadagiti kameng ti GUMIL Filipinas, Timpuyog Dagiti Mannurat iti Iluko, Wadan, ken dadduma pay a gunglo, ketdi, listaan (koma) daytoy dagiti amin a mannurat nga Ilokano-- dagiti nagsursurat ken dagiti aktibo nga agsursurat, tapno adda madadaan a pangadawan kadagiti bionote no kasapulan. 

Saan ketdi a karaman iti daytoy a listaan dagiti Ilokano nga agsursurat laeng iti sabali a lengguahe (ket saan iti Ilokano). Kadagiti saan a nairaman, wenno kadagiti kayatna a ma-update ti bionote-na, ag-e-mail-kayo laeng iti daytoy numo iti asseng(dot)tabag(at)gmail(dot)com. 

Dios ti agngina, apo.

ABRIL P. VARILLA. Tubo ti Simbaluca, Sta. Teresita, Cagayan a nakaipasngayanna idi Abril 9, 1970. Nagnaed ti pamiliana iti Minanga, Buguey, Cagayan. Nagturpos iti Bachelor of Theology iti Aparri Bible Seminary ken nagadal pay iti Liberal Arts iti Lyceum of Aparri. Nagtrabaho iti Philippine Mission of Churches of Christ of Northern Luzon, Inc. Iti agdama, agnanaeddan iti bukodna a pamilia iti Canada.

AIDA CAMPOS-TIAMA. Nangisursuro iti U.P. College Clark Air Base ken U.P. San Fernando (Pampanga), Supervising Administrative Officer ita iti U.P. Archaeological Studies Program. Autor ken co-author kadagiti libro, naipablaak dagiti sinuratna a daniw, sarita ken salaysay iti nadumaduma a libro, magasin ken pagiwarnak iti Filipinas ken iti dadduma a pagilian. Autor ti Panagbiahe, antolohia dagiti daniwna, nga impablaak ti NCCA ken Ateneo Institute of Literary Arts babaen ti UBOD New Author Series idi 2010.

AILEEN R. RAMBAUD. Tubo iti Puritac, Pinili, Ilocos Norte. Bugbugtong nga anak da Benjamin ken Evelyn Rambaud. Balediktorian iti elementaria ken haiskul iti Pinili, Ilocos Norte. Nagraduar iti kinamaestra iti MMSU College of Education iti Siudad ti Laoag. Maysa kadagiti Ten Outstanding College of Education Students iti panagturposna idi 1998. Agdama a Teacher III iti Don Mariano Marcos Memorial School, Pinili District, Pinili, Ilocos Norte, pinullon a saritana ti naipablaak iti Bannawag.

ALBERTO UGALINO. Tubo iti Magsingal, Ilocos Sur. Agnaeddan ken ti asawana iti Hawaii. Akimpartuat kadagiti berso pormas nga “ 8-liner”, “duata” ken “galleta”.

ALEX V. YADAO. Tubo iti Libertad, Abulug, Cagayan, nagturpos iti sekundaria iti Libertad National High School. Nagpaay iti dose a tawen iti Greek Mission to the United Nation (New York Headquarters) a kas Staff. Isu ti Founder ken Presidente ti ALVIYA Literary Foundation a
mangisaysayangkat iti tinawen a pasalip iti panagsuratan iti Literatura Ilokano ken kadagiti literary seminars ken workshops. Agnaed iti agdama iti New York City.

ALEXANDER R. BARUT. Nayanak idi Abril 21, 1965 iti Vintar, Ilocos Norte. Nagadal iti Mariano Marcos State University kadagiti sumaganad a kurso: Bachelor of Secondary Education, major in Physics and minor in Math; Master of Arts in Education, major in Physics and minor in Math; Doctor of Philosophy, major in Rural Development and with cognates in Developmental Communication. Nangisuro iti Saint Nicholas Academy, Vintar, Ilocos Norte; Ilocos Norte National High School, Laoag City; Northwestern University, Laoag City; St. Mary’s Seminary, Laoag City; Mariano Marcos State University, Batac, Ilocos Norte. Nagserbi a Provincial Statistician iti National Statistics Office, Ilocos Norte. Iti agdama, mangisursuro iti Jefferson High School, Texas, USA. Addan naipablaak a daniwna iti Bannawag, ken kas kumakanta, improdius ti Aweng Records ti umuna nga albumna, ti For Adults Only.

ALFREDO G. PADIOS (Mayo 23, 1956- ). Inunaan iti tallo nga agkakabsat nga annak daydi Dios-ti-aluadna nga Ignacio Padios ti Tuyo, Sta. Teresita, Cagayan ken Leonila Garcia ti Dardarat, Cabugao, Ilocos Sur. Nainspirar ken nakarit nga agsurat gapu iti buridek a kabsatna, ni Prodie. Ti kabsatna ti nakatakuat nga adda inalatna a kas mannurat, ket babaen met laeng ti tulong ken pammagbaga ti kabsatna, naipablaak dagiti dandaniw ken saritana iti Bannawag, ken iti Tawid Magazine. Nagtrabaho iti Production Department ti Liwayway Publishing, Inc. kalpasan a naglusulos kas electrician ti Meralco. Nayasawa ken ni Beverly Garcia ti Buyun, Sta. Teresita, ken naaddaanda iti walo nga annak. Agnaed ita ti pamiliana nga inulilana iti Cogeo, Antipolo City.

AMADO I. YORO. Nakipagbuangay ken opisial/mamagbaga kadagiti nadumaduma a gunglo-sibiko iti Filipinas ken iti Hawaii a pagnaedanna iti aganayen nga uppat a pulo a tawen. Kasla saangan ti dalikan ti biagna: komunidad, simbaan, literatura. Premiado a mannurat, naisaad kenkuana ti Pedro Bucaneg Award ti GUMIL Filipinas (2002). Markado a volunteer, naipaay kenkuana ti Thomas Jefferson Award (1987); Pride of Waipahu (1988); ken Community Service Award ti Lions Club International.

ANSEL D. CARGO. Naipasngay idi Enero 24, 1954 idiay Sipulo, Bacnotan, La Union kada Juan C. Cargo, Sr. (pimmusayen) ken Francisca Dacanay. Nalpasna ti B.S. Civil Engineering iti Adamson University, Manila, nagtrabaho iti Concrete Aggregates Corporation iti 21 a tawen kas I.T. Manager. Isu ti CEO ti Lechats Ventures Co. Adun ti naipablaakna a sarita, daniw ken salaysay iti Bannawag ken Internet. Naipablaak iti Bannawag ti nobelana a “Hotel De Amor”. Naparaburanda ken dati a Marilyn Cueto iti dua a sagibo, da Felice Anne ken Nico Paolo.

ARIEL S. TABAG. Editor iti daniw ken showbiz iti Bannawag. Co-editor kadagiti libro nga impablaak ti GUMIL Filipinas. Maysa kadagiti nangbukel iti Daniw ken Basi, maysa a performing arts group a pakairamanan dagiti mannurat nga Ilokano. Bahista ti Samtoy (Ilokano a banda nga agtugtugtog iti rakenrol a daniw) ken Pilo. Nangabaken kadagiti salip iti panagsuratan iti Ilokano ken Filipino. Nakaipablaaken iti libro, ti Karapote nga antolohia dagiti 13 a saritana. Impatarusna iti Filipino ti 13 a sarita dagiti agkabannuag nga Ilokano sa naipablaak a libro, ti Samtoy, babaen ti pannarabay ti NCCA. Siaasawa ken ni Norielyn Cullar a maysa a Tagalog. No saan nga agsursurat, sursuruanna nga agsao iti Ilokano dagiti dua a putotna, da Anib Miguel ken Saniata Noriel. Patanor ti Villa, Sta. Teresita, Cagayan.

ARNOLD C. BAXA. Patanor ti Bacarra, Ilocos Norte, tinurposna ti AB Political Science iti FEU, Manila sa nagpa-Hawaii idi 1967. Nag-editor iti Fil-Am News ken nag-anaunser iti radio iti Maui. Binuangayna ti Molokai Filipino Cultural Club ken GUMIL Maui. Premiado a public servant, nagpaay iti tallopulo ket maysa a tawen nga Immigration Coordinator iti Dept. of Housing and Human Concerns ti Maui County ken ti Lanai City ken Molokai. Uppat dagiti annakda ken dati a Rosalinda Leaño ti Cauayan City, Isabela: Arlene, Alexa, Arnold II ken Christopher. Impaay ti GUMIL Filipinas ti Pedro Bucaneg award (2010) kenkuana.

ARTEMIO C. BAXA. Natenneb iti rigat iti Teppang, Bacarra, Ilocos Norte a nakaipasngayanna. Umuna a Filipino a Hues iti Maui County. Nagretiro a hues idi 2001 ngem nagsubli nga abogado idi 2005 ket makapagparang iti sanguanan ti Supreme Court ti Estados Unidos. Kameng iti Board of Regents ti University of Hawaii System (2008-2013). Namin-adun a napadayawan kas naisangsangayan a makipagili, maysa kadagiti Commissioner iti State Filipino Centennial Commission.

AURELIO S. AGCAOILI. Propesor titular iti Unibersidad ti Hawaii ken agdama a koordinador iti programa nga Ilokano iti nasao met laeng nga unibersidad. Inringpasna ti doktorado iti Unibersidad ti Filipinas iti babaen ti maysa a becapresidencial. Inringpasna pay ti masterado iti pilosopia ken masterado iti panagmanehir, malaksid ti bachilier iti arte klasikal ken bachilier iti pilosopia. Sakbay ti panagbayanggudawna iti EstadosUnidos, nagpaay a kas manursuro iti pilosopia, literatura, panagmanehir, ken adal kultural kadagiti nagduduma a kolehio ken unibersidad kas ti Unibersidad ti Filipinas, Unibersidad ti Santo Tomas, Unibersidad ni San Paulo, ken seminario mayor ken graduado a programa ti pilosopia ti Cristo nga Ari, Kolehio ti San Beda, Kolehio ti Santa Escolastica, ken Kolehio ti Miriam. Insuratna ti Dangadang, maysa a sosio politikal a nobela maipapan iti Filipinas, a nakabigbiganna a nobelista manipud iti Premio Centennial Literario ti Republika ti Filipinas. Nabigbig ti nobelana a Wayawaya babaen ti Belmonte Grant.Agpapaay ita a kas presentador ken produktor ti Talkback with Dr. Agcaoili iti publiko a television ti ‘Olelo iti Honolulu. Isu pay ti hepe ti editorial ti Observer, maysa a pagiwarnak iti Hawaii. Iti agdama ket iringringpasna ti innem a tomo ti diksionario nga Ilokano kas kadagiti sumaganad: Contemporary English-Ilokano Dictionary, Kontemporaneo a Diksionario nga Ilokano-Ingles, Kontemporaneo a Diksionario nga Ilokano-Ingles/Contemporary English-Ilokano, Komprehensivo a Diksionario nga Ilokano, Ilokano-English-Tagalog Dictionary, ken Tesoro ti Pagsasao nga Ilokano. Isu ti maysa kadagiti mabigbig a pundador ti tignayan a Nakem Conferences, maysa nga internasional a komperensia dagiti mangmangged kultural a mangitantandudo iti kultural a pluralismo a wagas ti edukasion ken panagbiag.

BENJAMIN P. PACRIS. Premiado a piksionista ken mannaniw. Agdama a chief information officer ti PIA-Ilocos Sur. TV newscaster/host iti Iluko Heritage Channel ken radio host iti DWRS iti Vigan City. Lecturer iti literatura ken kinaagiwarwarnak, nag-presidente iti GUMIL Ilocos Sur. Nalpasna ti BSE Com. Arts iti Divine Word College of Laoag ken nangala iti Masteral iti Public Administration iti UNP. Ni Vicky de Vera, admin. officer iti UNP ti k,aingungotna ken addaanda iti innem nga annak.

BENNY PONCE LOPEZ (Enero 3, 1944- ). Premiado a mannurat a tubo ti Namayacan, Buguey, Cagayan.

CARMENCITA IRONA RODRIGUEZ. Nayanak idi Hunio 22, 1961, tubo ti Dubeng, Bidduang, Pamplona, Cagayan. Maikatlo iti uppat nga annak da Geminiano Irona (pimmusayen) ken Francisca Yague-Irona (pimmusayen). Nangala iti BS Education iti Baguio Colleges Foundation. Agdama nga Officer-in-Charge ti Philippine Postal Corporation iti Pamplona. Nayasawa ken ni dati a Postmaster Jose M. Rodriguez. Addaanda iti tallo nga annak, da Charles Joewell ken Charlie Joey nga agpada a registered nurse, ken Cheryll Joyce nga estudiante iti nursing. Nangrugi a nagsurat iti Bannawag iti benneg ti “Ania ti Makunami” idi 1980. Naipablaak ti umuna a saritana idi 1982. Nangabak iti Salip iti Sarita nga intuyang ti Economy Tours and Travels, Inc. (ETTI) idi 1986. Nangabak pay iti benneg ti daniw ti GUMIL Sinait-Dakilang Ugat Awards idi 1983. Adun ti naipablaak a saritana iti Bannawag ken Liwayway.

CLARITO G. DE FRANCIA. Nagop-opisial iti GUMIL Filipinas, nakitinnagnawa met kadagiti immuna a nangibagnos tapno makaaddang ti TMI. Sigud a propesor iti Mass Communications iti University of the Cordilleras. Paglinglingayanna ti agpinta ken agputar iti kanta. Nagdappatda ken kaingungotna a Rosemarie B. Calisen-de Francia iti Santa Maria, California. Lisensiado a real estate broker iti nasao nga estado ken agtartrabahoda ken baketna iti New America Realty.

CLES B. RAMBAUD. Editor ti Bannawag a nagkamenganna sipud pay idi 1978, naipaay kenkuana ti Gawad Emmanuel Lacaba idi 1994 manipud iti NCCA. CCP grantee para iti nobela ken sarita a para ubbing. Premiado a mannurat (GRAAFIL, Bannawag, kdp.), editor ken designer kadagiti nadumaduma a libro nga impablaak ti GUMIL Filipinas. Naawisen iti nadumaduma nga internasional a komperensia dagiti mannurat, para patarus ken editor, kaudian idiay Shanghai, China idi Setiembre, 2008. Inyalatna ti 2009 Writers Prize para iti Daniw iti Ilokano manipud iti National Commission for Culture and the Arts.

CORAZON F. QUIAMAS. Tubo iti Laoag City. Nagpapaay a head teacher iti Gabu National High Shcool (Laoag City) ken officer-in-charge iti nadumaduma a Diocesan Catholic Schools iti Ilocos Norte sakbay a nagpa-Hawaii. Iti agdama, agpapaay a kas sertipikado a mangisursuro iti maysa a pagadalan publiko iti estado ti Hawaii. Maysa a mannaniw iti Bannawag. Agnaed ni Razi (birngasna) iti Ewa Beach, Hawaii ken ti pamiliana— ni Daisy a kaingungotna, ken da Daniel John, 12, ken Dominick, 10, a putotna.

CRISOSTOMO M. ILUSTRE. Iti tawenna a nasurok a pitopulo, isu ti Operations Consultant ti Century Broadcasting Network. Sakbayna, nagtrabaho idiay Laoag, Pangasinan, Baguio ken Manila kas Assistant Operations Director ti Bombo Radyo Philippines, ken PIO iti Pangasinan. Nupay adun dagiti saritana iti Bannawag, ad-adda a radio ti nagsursuratanna— inrugina ti Ilokano a drama iti radio iti DZJC-Laoag idi 1961. Nageditor ken nagkolumnista kadagiti nadumaduma nga Ingles a pagiwarnak iti Dagupan, Baguio, Ilocos Sur, ken Ilocos Norte. Impaay kenkuana ti UMPIL ti Pambansang Alagad ni Balagtas (2011) gapu iti naisangsangayan nga akemna iti pannakaitandudo ti Drama nga Ilokano iti radio.

CRISPINA B. BRAGADO. Naisaad kenkuana ti Leona Floretino Award (GUMIL Filipinas) ken Gawad Pambansang Alagad Ni Balagtas (UMPIL). Agdama a Directress ti Child Jesus College (iti Bagong Silang, Caloocan City) a pinundarda ken ni kaingungotna a Jose A. Bragado. Nayanak idiay Buy-otan, Bauang, La Union idi Oktubre 25, 1937. Impablaak ti Bannawag ti umuna a saritana, ti “Dalluyon” idi Nobiembre 10, 1958. Impablaakna ti Ang Pilipinas At Karatig Sa Bagong Lipunan, textbook para kadagiti agad-adal iti Grade 5.

DANIEL L. NESPEROS. Premiado a mannaniw ken piksionista, nairaman ti saritana nga “Opas” iti Ani 31 nga impablaak ti Cultural Center of the Philippines. Fellow ti Daniw Iluko iti 26th UP National Writing Workshop idi 1996. Patanor iti kataltalonan ti Bario San Lorenzo, San Nicolas, Ilocos Norte. Kaingungotna ni sigud nga Imelda S. Queppet— addan maysa a kurkuriroda, ni Ian Dane Anib. Pasado a tesorero ti GUMIL Filipinas (2003-2007). Pagliwliwaanna ti agdisenio iti libro.

DANILO B. ANTALAN. Premiado a mannurat iti sarita kadagiti nadumaduma a pasalip a pakairamanan ti Palanca. Reporter iti DZTP Radio Tirad Pass iti Candon City a puonna. Sumagmamano kadagiti sarita ken salaysayna ti naipablaak iti Bannawag. Inyalat ti umuna a nobelitana ti Umuna a Gunggona iti 1st Fele Mann Literary Awards. Inaunaan iti tallo nga agkakabsat, naipasngay idi Marso 27, 1974 kada Julieta Bien ken daydi Estelito Antalan. Uppaten ti annakda ken Liza, da AJ, CJ, VJ, ken Jaeden.

Dagiti nangabak iti Salip iti Sarita ti 1st Alviya Literary Foundation, kaduada dagiti naghurado, iti pannakapadayawda. Manipud iti kanawan: Alex V. Yadao, pundador ken presidente ti Alviya Foundation; Danny B. Antalan ti Siudad ti Candon (Umuna a Gunggona), Daniel L. Nesperos ti San Nicolas, I.N. (Maika-2), ken Arnold Pascual Jose (Maika-3) ti Siudad ti Laoag, ken dagiti naghurado (agpakanawan): Cles B. Rambaud, chairman; Roy V. Aragon, kameng; ken Dionisio S. Bulong, kameng. Ti ALVIYA ti maysa kadagiti naruay a pasalip iti panagsurat iti Ilokano a mangar-aron iti interes dagiti mannurta nga Ilokano ken mangipapaay iti malabon a subad iti talento dagiti mannurat nga Ilokano nga iti sabali a bangir, mangipapaay met iti di magatadan a kontribusion iti Literatura Ilokano.


DARDANELIA SALVADOR-DOMINCEL. Naipasngay idi Enero 4, 1948. Dimmakkel iti Minanga, Buguey, Cagayan. Nagsekundaria iti Northeastern Academy, Buguey, Cagayan. Nalpasna ti Course of Secretarial Science iti Sacred Heart of Mary’s Institution (SHOMI; St Paul of Aparri itan). Nagturpos iti Associate of Theology iti Aparri Bible Seminary, Aparri, Cagayan. Nagtrabaho a kas News Reporter ken regular nga article contributor iti Christian publication a CRONICAS manipud 1985-2003 iti babaen ti Philippine Mission Churches of Christ of Northern Luzon Inc. iti Aparri, Cagayan. Sumagmamano a sinuratna ti naipablaak iti Bannawag ken nangab-abak kadagiti lokal a pasalip iti panagsuratan. Tallo ti bungada iti daydi Pastor Francisco Domincel, da Bituin (soprano artist ken agnaed iti New Jersey, USA), Apollos (AB English), ken Abel (registered nurse). Agnaed iti Macanaya, Aparri, Cagayan.

DERICK MARCEL F. YABES. Premiado a mannaniw, inyalatna ti Umuna a Gunggona ti salip iti daniw ti AVAIL idi 2010, ken maysa kadagiti kangrunaan a gunggona iti on-the-spot poetry writing contest iti kombension ti GUMIL Filipinas idi Kalgaw 2011. Nairaman ti saritana a “Ti Lubong ni Linglingay” iti Segden, ti umuna nga antolohia dagiti sarita dagiti mannurat iti Cagayan a nayalnag idi maika-44 a Komperensia Nasional ti GUMIL Filipinas sadiay DMMMSU, Bacnotan, La Union. Adda metten sumagmamano a naipablaakna a dandaniw iti Bannawag. Sertipikado nga elektroniko ken nagturpos iti Cagayan State University – Carig idi 1998. Nagadal iti kinamaestro sadiay CSU-Sanchez Mira ngem saanna pay a naiturpos. Miembro iti Mangngaggo Club (maysa a grupo dagiti mannaniw/mannurat iti erotiko). Maysa kadagiti agdisdisenio ken aglaklako iti Kaggo Shirts. Naayat pay nga aglakolako iti uray ania la ditan a mabalin a pangalapkapan. Addan maysa a putarna a kanta nga Ilokano, ti “Sabong iti Facebook” a pinutaran ni Noraline Domingo iti melodia ken kinanta ni Alexander Reyes Barut ken nairaman iti album daytoy a For Adults Only. “Derick Thor Yabes” ti us-usarenna iti Facebook, Google+, ken Twitter a kangrunaan a pakakontakan kenkuana. Adda metten sumagmamano a blog-na a pangur-urnonganna kadagiti di pay naipablaak ken naipablaaken a sinuratna. Kadagiti uppat a bunga, isu ti umuna a bunga ti naindaniwan a kanito da Ester Masuli Fillomena (Centro 2, Sanchez Mira, Cagayan) ken daydi Marcelino Valoria Yabes Sr. (Maddalero, Buguey, Cagayan) a dati a kameng ti Konstabularia. Addan mangpabpabara kadagiti nasalemsem a parbangonna ket madaman nga agputputar iti sibibiag a daniwna.

DEXTER B. BIZ. Nayanak idiay Palagao, Sta. Teresita, Cagayan idi Marso 2, 1983. Nagturpos iti BSECE iti University of Saint Louis-Tuguegarao City. Agtrabtrabaho kas technical support engineer iti maysa a telecom supply company iti Makati. Pasaray agawat kadagiti web ken multimedia design projects.

DEXTER M. FABITO. Naipasngay iti kalapaw a nagdiding iti nalaga a bulong ti niog ken nagatep iti labig a binangon da Larry Fabito, tubo iti Romblon a paggapgapuan dagiti marmol, ken sigud a Conchita Marin (pimmusayen) ti Balingit, Pamplona, Cagayan. Tallo ti liwliwada ken Romaly Victoria a kagudua ti pusona, da Zedrix John, Zandra Nicole ken Zachary Drexler. Inleppasna ti BSIT iti Cagayan State University iti Sanchez Mira. Nag-Ilokano Editor iti The Libertarians, ti department paper-da iti College of Arts and Sciences. Nakaipablaaken kadagiti daniw ken salaysay iti Bannawag ken Rimat ken sarita iti Tawid News Magasin. Nangab-abaken iti pasalip iti daniw a pakairamanan ti AVAIL, CABIE Pinili ken RFAAFIL a nakagun-odanna iti Reader’s Choice Award. Damona ti mangabak iti pasalip iti sarita iti 14th AMMAFLA (maikatlo a gunggona) babaen ti saritana a “Talon.” Nagsekretario iti barangayda. Agdama ita a Barangay Kagawad. Fellow iti 3rd Pasnaan (2012). Pagaayatna ti agpatubo kadagiti mula a para-bonsai ken para iti landscape gardening. Panggepna ti agputar iti liriko ti kanta iti Ilokano ken Tagalog.

DIONISIO “SONNY” E. ABRAJANO. Nayanak, dimmakkel ken nagadal iti elementaria ken hayskul iti Paoay, Ilocos Norte. Nangala ti AB Pre-Law iti FEU ken PCRTP iti PLM. Iti Pebrero 18, 1962 a bilang ti damo a pannakaipablaakna ti Bannawag. Nagpaay ken agpapaay a kameng kadagitoy: Manila’s Finest Retirees Association; Philippine National Police Retirees Association; Association of Chiefs of Police of the Philippines; International Association of Chiefs of Police; GUMIL Metro Manila; GUMIL Filipinas; ken National Press Club.

DIONISIO S. BULONG. Naipasngay idiay Simbaluca, Sta. Teresita, Cagayan (dati a paset ti Buguey) kada Vicente Q. Bulong ken Felipa A. Soliven idi Marso 10, 1940. Nagturpos iti elementaria iti Buguey Elementary School ken hayskul iti Northeastern Academy, Buguey, Cagayan. Nagadal iti steno-type iti National Business Institute, San Fernando, La Union. Naipablaak ti umuna a saritana, ti “Umaykan, Gasat,” iti Bannawag idi 1962. Inrugina ti AB Journalism iti University of Manila, immakar iti Lyceum of the Philippines kalpasan ti dua a tawen ket tinurposna dita ti Bachelor of Science in Journalism. Nagkameng iti Bannawag idi 1967 kas proofreader. Naital-o a news section editor sa associate editor kalpasan ti lima a tawen. Naital-o nga editor kalpasan manen ti lima a tawen. Nadutokan a chairman ti editorial board dagiti uppat a magasin ti Liwayway Publishing, Inc. (Bannawag, Liwayway, Bisaya ken Hiligaynon) sakbay a nagretiro idi Abril 2005. Pedro Bucaneg (GUMIL Filipinas) ken Pambansang Alagad ni Balagtas (UMPIL) awardee, maysa kadagiti teddek ti kontemporario a Literatura Ilokano a maisalumina ken am-ammo kas nagputar kadagiti naidumduma a makaray-aw a nobela nga Ilokano a “Fighting Pogi,” “Anderson,” Matayakon, Rosing,” “Kontra-Pelo,” “Brad Patrick,” “Flash Mauricia,” “Daddy BC,” “Tisoy,” “El Guapito,” ken namaglatak kadagiti piksional ken pudno a lugar a Lingasin ken Simbaluca iti Cagayan iti mapa ti Literatura. Kaingungotna ni sigud nga Eden L. Cachola ti San Antonio, Narvacan, Ilocos Sur, a padana met laeng a mannurat. Dua ti bungada, da Diodena (Doctor of Medicine) ken Anna Eloisa (Bachelor of Laws).

DJUNA R. ALCANTARA. Nageditor iti The New Lions Bulletin, ti pagiwarnak ti Lions Clubs International, District 301-C, Philippines. Executive Director ti Sir Pelagio Alcantara Development (SPADE) Foundation, nagturpos iti UP-Diliman idi 1981. Kas eskolar, intuloyna ti nangala iti Master in Development Management, iti Asian Institute of Management (AIM) iti Makati City, a nagturposanna idi 1997. Daydi Dios-ti-aluadna a Pelagio A. Alcantara ken ni sigud a Crescencia Robianes dagiti dadakkelna.

EFREN A. INOCENCIO. Master Teacher I iti Quiling Elementary School, Siudad ti Batac, ken District Coordinator iti Industrial ken Agricultural Arts iti DepEd I, Batac City. Agsursurat iti Bannawag, Liwayway, Modern Teacher, Bituen ken Segden. Agikut iti walo a pammadayaw iti Literatura Ilokana. Adviser ti Nodes and Internodes a pagiwarnak ti pagadalanda, ken maysa kadagiti editor ti Balikas a pagiwarnak ti GUMIL Filipinas a pagkamenganna.

ELISEO B. CONTILLO. Kameng iti Bannawag iti 17 a tawen, nadutokan nga Editor-in-Chief ti Narvacanews ken LGU consultant ti Narvacan, Ilocos Sur nga ilina. Public relations consultant, biographer, pintor, translator, songwriter ken insrumentalista, radio scriptwriter, ken premiado a dumadaniw ken mannurat iti sarita. Autor ti Tan-ok ti Kailokuan, ti biograpia ni Dr. Godofredo S. Reyes. Kameng iti National Press Club ken FAMAS, ken direktor iti GUMIL Filipinas, naipaay kenkuana ti Outstanding Narvacaneo Award in Journalism (1997).

ELIZABETH M. RAQUEL. Umuna a babai a nagpresidente iti GUMIL Ilocos Norte ken GUMIL Filipinas, insaad ti GF kenkuana ti 2009 Leona Florentino Award. Agdama a Public Schools District Supervisor iti Currimao District, Currimao, Ilocos Norte. Eskolar ti UNESCO-JAPAN idiay Indonesia idi l997 ket inadalna ti Literacy Education. Autor ti tallo a libro: Pagbasaan: Nonformal Education Para Kadagiti Levels II & III; PINILI: The Chosen Town; ken Literacy Education. Isu ti pannakabagi ti Northern Luzon iti Literary Committee iti NCCA.

ELMER LOPEZ. Naipasngay, dimmakkel iti komunidad dagiti agtaltalon iti San Lorenzo, San Nicolas, Ilocos Norte. Nairugina ti Electrical Engineering. Nalpasna ti kina-Electronic Technician ken Computer Hardware Technology. Nagtrabaho a kas computer technician agingga nga inkeddengna nga ipamaysa ti agtalon. Agsursurat iti daniw ken salaysay kadagiti rehional a pagiwarnak iti Kailokuan. Napadasannan ti nangabak iti sarita ken daniw. Maysa kadagiti editor ken mangilaylay-out iti TALDIAP (Timpuyog dagiti Agessem iti Literatura Dagiti Ilokano A Pintek), ti newsletter ti grupo dagiti agsursurat iti radio iti Siudad ti Laoag. Ni Precious Linglingay ti kakaisuna pay laeng a bungada ken sigud a Rica Joyce Balanay ti Claveria, Cagayan.

ELPIDIO A. UNABIA. Tubo ti Namayacan, Buguey, Cagayan. Kas mannurat, adu a sarita, pati nobela, ti naipablaakna iti Bannawag.

FEDERICO TANGONAN ILAC, JR. Premiado a piksionista. Tubo iti Pacis, Sinait, Ilocos Sur, nalpasna ti nursing iti Sta. Teresita General Hospital, School of Nursing ken Manila Central University. Nagtrabaho a company nurse iti Chemical Industries of the Philippines, sa staff nurse iti Quezon Institute. 2nd Lt iti AFP, Nursing Corps (res). Nagtrabaho a nurse iti Kuwait Ministry of Public Health. Emergency nurse ita iti Trinitas Regional Medical Center, Elizabeth, NJ. Ni sigud nga Arlene Caalim ti kapisi ti pusona.

FERNANDO B. SANCHEZ. Premiado a mannurat iti sarita ken salaysay, mannaniw, nobelista, naipaayen kenkuana ti Pedro Bucaneg Award (2006) manipud iti GUMIL Filipinas ken Pambansang Alagad ni Balagtas (2012) manipud iti UMPIL. Nagturpos iti BSEED (MLQU, Manila) ken addaan iti MA (Luna Colleges, Tayug) ken Doctoral (PSU, Urdaneta City), isu ti Public Schools District Supervisor ti San Nicolas District I, Research Director ken Professor ti Graduate Studies (Luna Colleges), Bise-Presidente ti GUMIL Filipinas ken Church Elder ti San Nicolas Seventh-Day Adventist Church. Tubo iti Cacabugaoan, San Nicolas, Pangasinan.

FRANCISCO V. DELA CRUZ. Naipasngay iti Naguilian, Lallo, Cagayan idi Septiembre 17, 1942. Nagkolehio iti Cagayan Valley Agricultural College iti Lallo, Cagayan (Cagayan State University–Lal-lo Campus itan). Nalpasna ti Master of Public Administration iti University of La Sallette iti Santiago City, Isabela. Napan sadiay Australia idi 1988 tapno leppasenna ti Special Course iti Rural Planning and Development. Nagpaay kas Chief Agrarian Reform Program Officer ti Department of Agrarian Reform Provincial Office iti Cagayan. Agpapaay pay a broadcaster iti DWPE, Radyo ng Bayan iti Siudad ti Tuguegarao manipud idi 1989 agingga iti agdama. Nangrugi nga agsurat iti Bannawag idi 1967 babaen ti saritana a “Panaglibas.” Kapadesna nga agsurat iti sarita ken salaysay idi 1970 agingga iti 1992. Nagdirektor iti GUMIL Filipinas idi 1991-1993.

FRANCISCO T. PONCE. Premiado a mannurat, naisaad kenkuana ti Pedro Bucaneg Award (2008) manipud iti GUMIL Filipinas. Autor ti dua a libro: Bin-i ti Biag, nakatiponan dagiti dua nga ababa a nobela, ken dagiti sarita ken daniwna; Sabong ti Biag, nobela a naiserye iti Bannawag. Tubo iti Napo, Magsingal, Ilocos Sur, inkallaysana ni dati nga Aurora S. Cacdac ti Naguilian, La Union— tallo ti bungada, da Daisy, Francisco, Jr., ken Catheryn; liman ti appoda. Agnaedda nga agassawa iti Ewa Beach, Hawaii— estado a nagnaedanda sipud pay idi 1970.

FRED A. QUIBOL. Nayanak ken dimmakkel idiay Puro, Caoayan, Ilocos Sur. Da Catalino Quibol ken Simeona Ambida, agpada a pimmusayen ,dagiti dadakkelna. Nagturpos iti inhenieria sibil iti FEATI University, Manila idi 1974. Nagtrabaho iti National Irrigation Administration iti nasurok a sangapulo ket maysa a tawen sakbay a napan idiay Hawaii idi 1985. Iti agdama, agtrabaho iti Naval Facilities Engineering Command iti Pearl Harbor, Hawaii a kas Navy Technical Representative. Ni Cherry Sawit ti kaingungotna. Addaanda iti dua nga anak, da Floris ken Princesa.

FREDDIE G. LAZARO. Mannurat iti Ingles, Tagalog ken Ilokano, agpapaay iti Philippine Information Agency (PIA)-Ilocos Sur sipud pay 2000. Premiado nga agiwarwarnak, inyalatna ti dua a pammadayaw nga inesponsoran ti Philip Morris Brightleaf Journalism Awards iti nagsaruno a tawen (2007 ken 2008). Tubo iti Burgos, Ilocos Sur, maysa kadagiti Fr. Jose Burgos Awardees (2008) ken adu a pammadayaw manipud kadagiti nadumaduma nga ahensia ken organisasion iti probinsiana. Agdama nga auditor ti GUMIL Filipinas.

FREDDIE PA. MASULI. Agdama a mangisursuro (Assistant Professor III) ken administrador (Dean, College of Information Technology) iti Cagayan State University (Sanchez Mira  Campus). Nagserbi met laeng a kas instruktor iti tallo nga institusion ti edukasion iti Kamanilaan iti las-ud ti pito a tawen. Inkeddengna a nasaysayaat nga agsubli iti provincia idi agsimpada ken sigud nga Olive  F. dela Cruz ti San Miguel, Bulacan tapno iti provincia a nakaiyanakanna a patan-ayenda ti familiada. Addan tallo a nalulungpo ken alikuteg nga ubbing nga an-anawaenda, da Genesis, Izzhi ken Zha-Lei. Nagturpos iti Bachelor of Science in Information and Computer Science (BSICS) iti St. Paul University, Tuguegarao City idi 1993. Nagleppas met iti sekundaria iti Libertad National High School (Abulug, Cagayan) ken iti elementaria iti Libertad Elementary School (Abulug, Cagayan). Naiyanak sadiay Libertad, Abulug, Cagayan idi Abril 16, 1971 kada Benturino A. Masuli ken ni sigud a Visitacion I. Padua. Bigbigenna ti bagina nga anak ti daga (talon, bakir ken bangkag), ta ditoy a nagrikus ti kinaubingna ken ditoy a nagtaud ti kadakkelan a paset ti pinagadalna. Arapaapna a no dumtengto ti panagretirona, agsubli met laeng iti bangkag a dimmakkelanna. Kas premiado a mannurat, nangabak iti namitlo nga agsasaruno a daras a First Prize iti AMMAFLA, ken iti Sta. Raffaella Awards, AVAIL kdpy.

GREGORIO M. EVANGELISTA. Tubo ti Sto. Niño, Cagayan. Premiado a mannurat. Maysa a mannalon ken lider iti kooperatiba dagiti mannalon.

HERACLES LORD BERNARDO A. CABIE. Kameng ti GUMIL Metro Manila, dati a bokalista ti Kizzum Band ken 4Play Band iti Metro Manila. Kompositor ken lirisista iti nadumaduma a klase ti kanta— rap, ballad, slow rock ken reggae. Nangab-abak iti elocution contest ken debate idi agad-adal iti San Beda College, Mendiola. Agdama a Field Researcher ti Cabie Cabie Book Authors and Associates. Kaingungot ni dati a Maria Louisa Santos; ama da Maria Natalie, Mikhail Bernard VIII ken Mirko Sean Alexander.

HONOR BLANCO CABIE. Am-ammo ni Honor Blanco Cabie, naideklara nga Ari Dagiti Sumasarabitniw ti Ilokandia idi 2008, kas agsursurat iti bitla dagiti addaan akem iti gobierno nasional ken sektor pribado. Premiado nga orador, debatista, sumasalaysay ken kumakansion, agsursurat daytoy a trombonista iti lirika ken nota dagiti putputarenna a samiweng. Dati a coach ti San Beda College of Arts and Sciences Debating Team, nangabak idi nakasangona ti SBC Law Debating Team idi 1992, ken Coach ti Far Eastern University Oratorical and Debate Club, nangyawid iti Annual Devesa Cup idiay De La Salle University ken iti Bedan Grail idiay San Beda College agpada idi 1996. Outstanding Alumnus ti San Beda idi 1992 ken ti Asian Institute of Journalism and Communication idi 2000. Napili nga Ulirang Ama idi 2002.

JAIME G. RARAS. Premiado a mannurat. Autor iti dua a libro, ti Basikaw ken Ti Bangbanglo ni Dangaw ken Dadduma Pay a Sarita a Para Ubbing, nga agpada a rimmuar idi 2007. Assistant Professor IV ken agdama a Director for Academic Affairs ken concurrent Planning Officer iti North Luzon Philippines State College (dati a UNP Candon campus). Nayanak iti San Vicente, Ilocos Sur ngem agnaeden iti Candon City. Duan ti annakda ken dati a Luz Anglo, da Paul James ken Jaime Rino II.

JAKE F. ILAC. Tubo iti Brgy IBJ, Lasam, Cagayan ngem agindegen ken ti pamiliana iti Valenzuela City nga isu met laeng ti pagobraanna a kas maysa a Sales and Marketing Director iti pagaramidan ti silaw. Addaanda iti maysa a bunga ken ni dati a Divina Bulaqui, tubo iti Gattaran, Cagayan. Kameng iti GUMIL Metro Manila ken mannurat iti Bannawag. Nakaawat metten iti pammadayaw manipud iti KWF, Premio Duque ken AMMAFLA.

JEFFERSON A. APOLONIO. Tubo iti Cabaroan Daya, Vigan City ngem dimmakkel iti San Rafael, San Esteban, Ilocos Sur. Pito a daniwna ti nairaman iti Batonsileng (1992), ken maysa kadagiti editor ti Sagibo (1994). Malaksid iti panagsurat, pagaayatna ti agay-ayam iti ahedres. Nagtrabaho iti Motor Vehicle Administration iti estado ti Maryland sa iti Montgomery County Public Library iti isu met laeng nga estado. Kaingungotna ni dati a Mary Jane R. Oandasan ket ni Janerson Benedict ti kakaisuna a bungada.

JENNIFER A. TAGAVILLA. Naiyanak ni Jennifer A. Tagavilla iti Siudad ti Batac, Ilocos Norte. Inauna iti uppat nga annak da Romeo C. Tagavilla ken ni sigud nga Everlina Aribuabo. Madama a lepleppasenna ti kurso a Bachelor in Elementary Education iti Divine Word College of Laoag. Nagtrabaho nga Administrave Aide III ken Peer Educator iti DepEd, Division Office of Batac City idi 2010-2011. Agdama a Provincial Correspondent iti Around Ilocandia Channel iti Vigan, Ilocos Sur ken sagpaminsan agparang a kas TV co-host iti programa iti bigat nga “Antokoy In Da Haus.” Nakaipablaaken iti sumagmamano a daniw iti Bannawag.

JIMMY C. VIVIT. Tubo ti Palagao, Sta. Teresita, Cagayan, ngem naikamang idiay Newagac, Gattaran, Cagayan. Rinugianna ti Inhiniera Sibil kas iskolar ti simbaan iti Lyceum of Aparri, ngem dina naileppas ta siniluan ni Jacky Cabildo ti pusona. Agnaedda a sangafamilia a Newagac. Kas humorist, adu a saritana ti naipablaak iti Bannawag a pakasaritaan ti favoritona a karakter, ni Mr. Balbalatong.

JOBERT M. PACNIS. Inauna iti dua a bunga da Roberto Gajoltos Pacnis ken dati a Josephine Fariñas Matias ti Brgy. Ammubuan, Ballesteros, Cagayan, naitao idi Hulio 28, 1978. Nalpasna ti Bachelor of Science in Electronics and Communications Engineering (BSECE) iti Cagayan State University, Carig, Tuguegarao City idi Abril 6, 2000. Nangala iti units-na iti Edukasion ket naigasatanna met a nairuar ti LET. Kas mannursuro, napadasanna metten ti nagisuro iti Northern Cagayan Colleges Foundation, Inc. ken Quezon Colleges of the North-- agpada a pribado a pagadalan iti ilina. Ita, addan a mangisursuro iti Aparri West National High School, Bulala Norte, Aparri, Cagayan. Kas mannurat, nangab-abak metten kadagiti pasalip iti panagsuratan (sarita, salaysay ken daniw). Ni dati a Judith Molina Simon ti Brgy. Zitanga ti kaingungotna; da Jethro ken Jiemil Anne dagiti bungada.

JOEL L. BAGASOL Naipasngay iti Dacal, Sanchez Mira, Cagayan idi Disiembre 2, 1972 kada Isidro Bagasol, Sr. ken Remedios L. Bagasol. Maysa a lider-estudiante, tinurposna ti B.S. Industrial Education major in Technology and Home Economics iti Mariano Marcos State University-Institute of Technology iti Laoag City. Maysa a maestro, mangisursuro iti agdama iti ilina.

JOEL B. MANUEL. Mannarita, mannalaysay, mannaniw, nobelista ken mangiruprupir iti kultura, agak-akem ni Joel B. Manuel a kas prinsipal iti Banna National High School, Banna, Ilocos Norte. Patubo ti Barangay Balioeg, Banna, Ilocos Norte kada Cipriano F. Manuel ken Herminia R. Barangan. Addan tallo ti libro nga impablaakna a nakatiponan dagiti sinuratna. Sumagduduapulo metten ti pammadayaw a nagun-odna iti benneg ti panagsuratan, sangapulo-ket-uppat kadagitoy ti nakagun-odanna iti Umuna a Gunggona. Idi 2005, impaay kenkuana ti ilina ti Most Outstanding Son of Banna, Achievement Award in Journalism and Literature. Lineppasna ti MA Language Education manipud iti UP-Diliman kas Academic Excellence Awardee ken iti babaen ti DepED-UP-NEAP Long Term Scholarship Program. Nangisuro iti sangapulo ket tallo a tawen iti Caribquib National High School, Banna, Ilocos Norte sakbay nga immakar iti agdama nga eskuelaan nga idadauluanna. Nayasawa ken ni Rayma Bella Velasco Manuel ti Barangay Fortuna, Marcos, Ilocos Norte. Kas agsuksukisok, addan dua a sukisokna iti edukasion ken kultura a naipresentar iti NAKEM International Conferences sadiay University of Hawaii, Manoa ken St. Mary’s University, Bayombong, Nueva Vizcaya. Nagpaay payen a kas panelist-presentor iti Taboan Writers Conference sadiay Cebu City.

JOHMAR R. ALVAREZ. Tubo iti Mabuttal East, Ballesteros, Cagayan. Anak da Ernesto U. Alvarez ken dati a Rosalina A. Rosario. Nayasawa ken ni sigud a Jhonna Belle A. Clemente ti Masaya Sur, San Agustin, Isabela. Nalpasna ti Automotive Mechanic iti NMYC (TESDA itan), Tuguegarao City ken BSE iti Bukig National Agricultural and Technical School, Aparri, Cagayan. Mangisursuro ita iti Aparri West National High School, Bulala Norte, Aparri, Cagayan. Isu ti adviser ti The Beachcomber, ti opisial a pagiwarnak ti pagadalan. Premiado a mannaniw/mannurat, adun a pammadayaw ti naawatna kadagiti nadumaduma a pasalip iti Literatura Ilokana. Nairaman dagiti daniwna a naipablaak iti Kastoy Nga Imbunubonmi Dagiti Balikas, Dagiti Kapintasan Nga Avant-Garde a Daniw Iti Iluko, 1995-1999 ken In Time Passing, There Are Things. Writing Fellow para iti Ilocano poetry iti 38th UP National Writers Workshop idi 2001 a naangay iti Baguio City.

JONATHAN B. TORRICER. Naiyanak iti napanglaw a pamilia, idi Agosto 13, 1976, maikadua iti uppat nga annak da Aurelio Torricer, Sr. a maysa a mannalon (pimmusayen) ti Allacapan, Cagayan (tubo ti Sto. Domingo, Ilocos Sur) ken dati a Carmelita Braceros a tindera iti ikan iti Allacapan a taga-Camalaniugan, Cagayan (tubo ti Cabugao, Ilocos Sur). Nagsursurat iti research, case study ken artikulo para iti asignatura tapno laeng makalpas iti panagadalna. Nagpaay a kas a reporter ti prensa iti Laoag City bayat ti panagbasana. Dati a kameng ti College Editors Guild of the Philippines (Region I ken National), miembro iti The Review a magazine ti nagadalanna a kolehio a nangileppasanna iti kina-nurse. Sakbayna, nangala iti AB Political Science iti Cagayan College Tuguegarao (University of Cagayan Valley itan). Kasimpungalanna ni sigud nga Annavic Jamorabon ti Burgos, Ilocos Norte. Naaddaanda iti maysa a bunga, ni John Andrei. Agnaedda iti Hawaii. Adun a daniwna ti naipablaak iti Bannawag.

JOSE A. BRAGADO. Maysa kadagiti kaaduan iti nasurat a nobela iti Ilokano, naipaayen kenkuana ti Pedro Bucaneg Award manipud iti GUMIL Filipinas ken ti Gawad Pambasang Alagad Ni Balagtas manipud iti iti UMPIL (1996); CCP Grantee iti Iluko epic (1982), Iluko Short Story (1988) ken Iluko drama (1990); presidente ti GUMIL Filipinas (1989-1991) ken 1999-2003. Nagretiro a Literary Editor ti Bannawag idi Hunio 30, 1997 tapno maipaysana ti takemna a kas presidente ti Child Jesus College iti Caloocan City. Tubo ti Tabucolan, Santa, Ilocos Sur.

JOSEPHINA V. HERREMA. Naiyanak idi Mayo 19, 1974 idiay Calasiao, Pangasinan ngem dimmakkel idiay Burgos, Ilocos Sur. Nagturpos iti kolehio kas maysa a secretarial associates iti NCBA, Sampaloc, Manila. Nagtrabaho kas maysa a private secretary iti CEPZA, Cavite City, sa nagabroad kalpasan ti nasurok a makatawen. Nakiasawa iti maysa a Hollander wenno Dutch ket naparaburanda iti dua nga annak a babbai. Iti agdama, agtrabtrabaho iti maysa a restauran iti Holland wenno Netherlands. Nagiray ken nasursurona ti agdaniw babaen ti naynay a panagpaspasiarna iti Internet a nakaam-ammuanna kadagiti mannurat nga Ilokano.

JOVITO F. AMORIN. Premiado a mannurat, adun a sarita ken sumagmamano a nobela ti naipablaakna iti Bannawag— kaudian a nobelana ti “Bonete Ti Kaibaan“. Ni dati a Natividad Elvena iti Tayum, Abra ti kaingungotna ket addaanda iti maysa a bunga, ni Jonathan Angelo. Kameng iti GUMIL Metro Manila ken GUMIL Filipinas.

JUAN AL. ASUNCION. Editor iti Literatura iti Bannawag, kameng ti FAMAS, miembro ti National Press Club, ken maysa kadagiti nakipagpundar iti Tabunay Builders Club (TBC) iti Tabunay, Sarrat, Ilocos Norte ti puonna. Nobelista iti komiks, mannaniw, mannurat iti sarita, bukanegan ken drama iti entablado a kaauan ti naiparang iti panagpiesta ti Sta. Rosa, Tabunay ken iti mismo nga ili ti Sarrat. Editor ken bookd designer dagiti nadumaduma a libro nga impablaak ti GUMIL Filipinas.

JUAN S.P. HIDALGO, JR. Mabigbigbig a maysa kadagiti nangbuangay iti GUMIL Filipinas ken iti U.P. Sunday Group. Gistayanna naapput ti National Artist award idi 2001. Nobelista, mannaniw, mannurat iti sarita, pintor, agipatpatarus, sipiritual healer, impaayanen iti pammadayaw dagiti sumaganad: CCP, UP Vanguard, Inc., GUMIL Filipinas, UMPIL, ken LGU ti Rosales, Pangasinan nga ilina. National Fellow for Ilocano Literature iti UP Creative Writing Center idi 2000-2001.

JUNLEY L. LAZAGA. Tubo iti Tagudin, Ilocos Sur, mangisursuro iti College of Arts and Communication ti University of the Philippines Baguio. Maysa kadagiti Fellow iti umuna a Cordillera Creative Writing Workshop a naangay iti Siudad ti Baguio idi Abril 2007, kalpasan a magun-odna iti isu met laeng a bulan ti Bachelor of Arts iti U.P. Baguio a nakalpasanna met laeng ti Master of Arts in Language and Literature. Maysa pay kadagiti Delegado iti umuna a Taboan: Philippine International Writers Conference (2010). Nakipagbangon iti Cordillera Young Writers, Inc. a nakabase iti Siudad ti Baguio, mannurat ti salaysay ken daniw iti Iloko, Filipino ken Ingles, agipatpatarus, ken naipaayan ti U.P. Baguio Golden Jubilee Award (2011) para kadagiti gapuananna a daniw. Ni Iñigo Daniw ti bungada ken ni kaingungotna a Janine Kaye C. Toca iti Donsol, Sorsogon.

JULIO V. BELMES. Naipasngay idi Hulio 31,1967 iti daydi Lucas Queza. Belmes iti Linasin, Bangued, Abra ken sigud a Catalina Biscarra Viejo iti Malabbaga, La Paz, Abra. Lisensiado nga Arkitekto ken OFW, nagtrabahon iti Saudi Arabia, Singapore, Dubai, ken Libya. Nangrugi ti essemna nga agsurat gapu iti maysa a babai ket amin a balligi ken pannakapaayna iti biag, gapu met laeng iti babai. Iti agdama, manamnama a mabirokannan ti pannakapnek ken talinaay iti sidong ti maudi a babai iti biagna.

LEILANIE G. ADRIANO. Tubo iti San Antonio, Pudtol, Apayao. Nagturpos iti Bachelor of Science in Development Communication iti MMSU, Batac, Ilocos Norte ken agdama a Senior Reporter ti Ilocos Times ken Correspondent iti nadumaduma a pagwarnakan kas iti Yahoo Philippines, VERA Files, Women’s Feature Service, UCANEWS kdpy. Inkakaubinganna ti nagbasbasa ti Bannawag a nakaipablaakan metten dagiti dadduma a salaysayna. Idi ubing pay, kakibkibinna ti transistor radio-da a pagdenggan kadagiti drama, bukanegan ken daniw a maibasa iti tangatang. Malaksid iti kinaduekna nga agsursursor kadagiti nadumaduma a disso a dina pay nabaddekan, maayatan la unay ta nasurotna met laengen ti desdes dagiti padana a mannurat nga Ilokano tapno maibunubon dagiti balikas iti Kurditan Samtoy.

LEONARDO S. FAGARAGAN. Dati a kameng iti PC Ranger a naidestino iti pagbabakalan kas idiay Zamboanga del Norte, Jolo, Sulu ken Bongao, Tawi-Tawi idi 1974 agingga iti l977 a kabara ti insurhensia. Naidestino kalpasanna iti III PC Zone, Cebu City sa iti Camp Crame, Quezon City a nagretiruanna a kas SPO2. Direktor iti GUMIL Filipinas, nangab-abaken kadagiti pasalip iti panagsuratan (AMMAFLA, AVAIL). Tubo iti Valbuena, Pinili, Ilocos Norte.

LINDA T. LINGBAOAN. Patneng nga Itneg ngem agsursurat, aged-edit ken agipatpatarus iti Ilokano, Ingles ken Filipino. Psychology ti tinurposna ngem ginuyod ti umuna nga ayatna: ti panagsurat ken panagbasa. Agsursurat iti daniw, sarita, ken salaysay ken nakasurat metten iti maysa a nobela a naipablaak iti Bannawag. Panagadal iti kultura popular aglalo iti pannakayaplikar daytoy iti biag dagiti agtutubo ken ti relasion daytoy iti literatura ti ad-adda a pagirayanna iti agdama. Agpapaay ita nga editor iti University of the Philippines Press.

MANCIELITO S. TACADENA. Graduado iti AB English/Masscomm iti UNP, Vigan City. Administrative Assistant II iti Provincial Planning and Development Office iti kapitolio ti Ilocos Sur, ken Program Director ken host iti programa iti agsapa a “Morning with Antokoy” iti Around Ilocandia Channel (AIC). Nakaipablaaken iti sumagmamano a sarita, salaysay ken damdamag iti Bannawag ken nadumaduma a warnakan iti Ilocos Sur. Agnaed iti Namruangan, Cabugao, Ilocos Sur. Baro pay.

MANUEL D. BENOSA, SR. Tubo iti Abinganan, Bambang, Nueva Vizcaya. Fulltime a mannalon, nangrugi a nagsurat idi dekada sitenta. Nakaipablaaken kadagiti sarita ken salaysay iti Bannawag, kasta met nga impablaak ti Hidalgo Creative Services ti nobelitana nga “Ogie and Sher” (1996). Uppat ti bungada ken ni sigud a Sherly M. Espino, da Sherma, Manuel Jr., Sherwin, ken Lucky Ryan. Adda metten dua nga appokona, da Pau-Pau (Lucky Ryan Jr.) ken Man-Man (Manuel III).

MARIA ROSA A. CABIE. Agdama a direktor ti GUMIL Filipinas. Dati a faculty adviser ti The New Floridian ti Florida Institute a nangisuruanna ken nagpaayanna a guidance counselor. Nagisuro pay iti Espiritu Santo Parochial High School iti Manila ken iti Dominican College Elem. Dept. ti San Juan, Metro Manila. Anak da dati a Zenaida B. Alegre ken Feliciano M. Atencio a nag-Mayor iti Moncada, Tarlac. Editor ti Dawa, pagiwarnak dagiti i-Pinili iti Metro Manila. Nangabak metten kadagiti salip iti daniw (COVVLA, AVAIL).

MARICHEL E. SUGUITAN. Maysa nga OFW iti Hong Kong ni Marichel Eugenio Suguitan. Tubo iti Solano, Nueva Vizcaya. Kameng ken opisial ti sumagmamano nga organisasion. Naayat nga agbasa iti libro ken dandaniw. Pagpalpallailanganna met ti agdengngeg kadagiti uray ania a klase ti musika, saan ketdi unay kadagiti love songs. Mannakigayyem. Bisitaen laeng iti facebook.com/marichelmorna.

MARK ANTHONY T. GANOTICE. Nayanak iti Manila idi Hulio 3, 1986 ngem dimmakel iti Sanchez Mira, Cagayan. Da Montano ken Rosabella Ganotice dagiti dadakkelna— maikanem iti pito nga agkakabsat. Ni Antawn Luis ti kakaisuna a bunga da ken Janice Orillaza a taga-Bicol. Agab-abang iti kuarto iti San Andres Bukid. Agpapaay a liaison officer iti maysa a review center dagiti nars iti Quezon City. Kameng ti GUMIL Metro Manila, daytoy saritana a naitipon itoy nga antolohia ti umuna a saritana a naipablaak iti Bannawag.

MARTIN FELICIANO T. ROCHINA. Nayanak iti Sta. Monica, Magsingal, Ilocos Sur ken maikalima kadagiti annak dagidi Andres Rochina ken Leonora Taay. Dua ti annakda ken ni dati a Teresita Viernes iti Nambaran, Sto. Domingo, Ilocos Sur. Kaaduan kadagiti sinursuratna a sarita, daniw ken nobela ti rimmuar iti Bannawag. Sumagmamano metten ti inabakna a pammadayaw iti panagsuratan iti sarita, daniw ken nobela. Pasado a presidente ti GUMIL Metro Manila, ken pasado a sekretario-heneral ti GUMIL Filipinas.

MARY JANE G. DALIGCON-ARAGON. Naipasngay iti Cabaritan East, Ballesteros, Cagayan idi Mayo 6, 1972. Nagturpos iti BS in Information and Computer Science (BSICS) iti St. Paul University (SPU) iti Tuguegarao City a nangileppasanna met laeng iti Master of Science in Information Technology (MSIT). Nalpasna ti Ph.D. in Information Technology. Nagpaay kas I.T. professor iti SPU iti nasurok a 10 a tawen sakbay nga immakar iti Cagayan State University iti Tuguegarao tapno agpaay a dekana ti College of Information Technology ti CSU. Iti agdama, agpapaay a kas Head, Information Technology Department iti Shinas College of Technology, Sultanate of Oman. Adu metten ti sarita, daniw ken salaysayna a naipablaak iti nadumaduma a magasin ken pagiwarnak a pakairamanan ti Bannawag. Nangabak iti salip ti daniw ti GRAAFIL idi 1992. Napili a Fellow iti Iloko Poetry iti 32nd U.P. Writers Workshop idi 1998. Kaingungotna ni Roy V. Aragon. Addaanda iti tallo a sagibo, da Sadiri Roy, Sirmata Jane, ken Imnas Cyberia Linglingay.

MELITON GAL. BRILLANTES. Premiado a mannurat, Pedro Bucaneg awardee; kas maysa kadagiti teddek ti kontemporario a Literatura Iloko, malaglagipto kadagiti naidumduma a sarita ken novelana a namsek iti local color ti Tanap ken pagbibiagan dagiti di malipatan a karakter nga Ilokano, Ibanag ken Aeta iti away, karayan ken kabambantayan ti Cagayan. Tubo ti Santa, Ilocos Sur ngem nagnaed ken ti familiana iti Sta. Teresita ken Aparri, Cagayan. Inrugina ti Fine Arts iti University of the Philippines, Diliman, Quezon City. Pimmusay idi Marso 20, 2004.

MIGHTY C. RASING. Rakista. Mannaniw. Piksionista. Kaingungot ni Charina Trinidad-Rasing. Agdama a youth worker, blogger, ken part-time businessman. Mabasa dagiti gapuanan ken dadduma pay a pakakumikomanna iti http://mightyrasing.com.

NARGLON C. UTANES. Naipasngay idi Marso 11, 1987 kada Narciso Alonzo Utanes iti Centro, Buguey, Cagayan, ken sigud a Gloria Jove Calubong iti Piggatan, Alcala, Cagayan. Kaingungotna ni sigud a Shelie nie Asuncion Villalon. Panagaramid iti halowblaks ken pasaray panagmason-karpentero ti panggedanna. Pagaayatna ti mapan agsirpat ken agkammel iti kaggo kadagiti dappat ti Karayan Buguey no kasta nga awan pagobraanna.

NELSON G. DALIGCON. Mannurat iti Iloko ken Filipino, nangrugi a makaipablaak iti sinuratna idi agtawen iti 16. Malaksid iti Bannawag, naipablaak dagiti sinuratna a sarita, daniw ken salaysay kadagiti sumagmamano a nasional a publikasion a kas iti Filmag ken Homelife, kadagiti web publications a kas iti The Makata ken e-Manila Poetry, ken kadagiti lokal a pagiwarnak iti Amianan. Nairaman met ti sumagmamano a sinuratna kadagiti antolohia a kas iti SAGIBO, Antolohia ti Sarita dagiti Agtutubo a Mannurat nga Ilokano; ken iti In Time Passing, There Are Things. Nangab-abak metten kadagiti pasalip ti panagsuratan. Nagig-iggem iti programa ti radio, gasut a daniw ken Bukanegan a pang-radio ti naputarna. Lima la a tawen a tinurposna ti elementaria ken haiskul babaen ti promosion, nagadal iti kolehio iti Cagayan State University ken St. Paul University. Bunga da Aurelio Macadangdang Daligcon (pimmusayen) ti Abariongan Ruar, Sto Niño ken sigud a Susana Temporal Guimmayen ti Cabaritan East, Ballesteros, agpada nga iti Cagayan. Agnaed itan iti Tuguegarao City.

NEYO MARIO E. VALDEZ. In-house editor ti Rex Bookstore, Inc. iti Quezon City, contributor kadagiti educational journals, ken freelance editor ken evaluator ken sumagmamano a publishing houses. Inleppasna ti abogasia iti PUP College of Law. Nangabaken kadagiti pasalip iti panagsuratan ken inruarna ti libro a Maysa a Panawen iti Sirok ti Kalunatsi, antolohia dagiti sarita. Tubo iti Nanguneg East, Narvacan, Ilocos Sur.

NOLI S. DUMLAO. Tubo iti Paoay, Ilocos Norte, resident writer iti Radyo Balintataw ti MBC-DZRH Radio— nangabak iti Best Drama Program ken Best Culture and Arts Program iti 17th Annual KBP Golden Dove Awards (2008) nga intuyang ti KBP. Mannurat iti Bannawag. Nagbalin a kameng ti Rimat (nagserran). Sumagmamano kadagiti saritana ti nangabak kadagiti pasalip kas iti Palanca. Katakunaynayna iti biag ti kailianna a ni Zenaida Galinato.

NORBERTO D. BUMANGLAG, JR. Tubo iti San Nicolas, Ilocos Norte, agnaeden iti Las Vegas, Nevada. Retirado iti United States Air Force, imatmatonanna iti agdama ti bukodna a negosio. Apagturposna iti Lyceum of the Philippines idi rinugianna ti nagsurat iti drama iti estasion ti radio iti Laoag ken Nangalisan. Nagsursurat iti sarita iti Bannawag aginga iti 1979. Nailibay ti plumana iti ipapanna iti America; kalpasan ti tallopulo a tawen, nakariing ti plumana ket sumagmamano a tawen a maysa kadagiti kaaktibuan a mannurat nga Ilokano iti agdama.

PRODIE GAR. PADIOS. Tubo iti Simpatuyo, Sta. Teresita, Cagayan. Lineppasna ti Liberal Arts ken rinugianna ti BSE iti Lyceum of Aparri. Premiado a sumasarita ken dumadaniw ken dramaturgo, nangab-abak kadagiti pasalip ti GRAAFIL, Kokua Lima Hawaii No, ETTI, GETSMAIL, COVLAA, KWF, kdpy. Nangabak iti grant para iti drama iti Iloko iti Cultural Center of the Philippines. Nangabak pay dagiti daniwna a Tagalog iti Talaang Ginto. Nobelista iti prosa ken komiks, novelana ti Rissik ti Essem, ken ti dagiti nalatak a novela iti komiks a Gudmirtid ken Anak ti Kapre, nga agpapada a naipablaak iti Bannawag a nagpaayanna a kas Literary Editor. Iti agdama, agpapaay a kas Circulation Carrier Supervisor ken kas umuna ken kakaisuna a Filipino a writer/blogger ti Red Deer Advocate, aginaldaw a pagiwarnak iti Central Alberta, Canada. Mabasa ti Filipino Connections a blogna iti reddeeradvocate.com. Kas Licensed ken Certified Reflexologist (nagadal iti Canada), imatonanna ti bukodna a klinika, ti Padios’ Reflexology, Wellness and Massage Clinic, iti Red Deer, Alberta, Canada a pagnaedanda a sangafamilia. Kaingungotna ni sigud a Nirvana Lansangan ket addaanda iti dua a bunga, da Bianca ken Odie.

RAQUELITO B. CENAL. Naipasngay iti Balingit, Pamplona, Cagayan idi Agosto 10, 1982 kada Antonio M. Cenal ken sigud a Raquel A. Belmonte. Inauna iti dua nga adienna, da Francis ken Rose Ann. Inleppasna ti Bachelor in Secondary Education, major in Mathematics iti Cagayan State University-Sanchez Mira Campus. Iti agdama, maysa a maestro ti Mathematics iti Claveria Rural and Vocational School. Addan dandaniw ken saritana a naipablaak iti Bannawag. Naiyasawa ken ni sigud a Charmaine Lei Daquigan ti Centro 6, Claveria, Cagayan. Addaandan iti maysa a bunga, ni Leiraq Clarisse.

RENATO A. PAAT ( Julio 4, 1941-Junio 14, 1996). Mannurat, edukador, ken ofisial ti ili nga anak ti Lasam, Cagayan. Maysa a premiado a mannurat, nagpaay a principal iti pagadalan ken nagserbi kas konsehal iti ilina.

REYNALD F. ANTONIO. Naipasngay idi Agosto 1, 1970 iti Marede, Sta. Ana, Cagayan. Isu ti founder/sponsor ti Reynald F. Antonio Awards for Iloko Literature (RFAAFIL) ken mangimaton iti www.rfaafil.com, ti kaunaan a website ni Ilokano iti Salip iti Sarita ken Daniw iti Internet. Nagturpos a cum laude iti BSBA-Accounting iti University of the East iti Recto, Manila ken nairuarna ti examen iti kinakontador idi 1992. Kaingungotna ni sigud a Tess T. Viduya ti La Union, sigud a mutia ti GUMIL Metro Manila ken 1st Runner Up a Mrs. GUMIL Filipinas. Tallon ti saringitda, da Aldrey, Adrian, ken Jathan.

REYNALDO E. ANDRES. Mannurat iti Bannawag, ken nadumaduma a magasin iti Ingles. Masansan nga aglektiur ti maipanggep iti Ortograpia Ilokana ken panagsurat kadagiti salaysay maipanggep iti agrikultura. Maysa kadagiti lider iti GUMIL Ilocos Norte.

REYNALDO A. DUQUE. Immawaten iti nasurok a sangasut a pammadayaw kadagiti salip iti panagsuratan iti daniw, sarita, nobela, drama, iti Ilokano ken Filipino kas iti Palanca, KWF, ken dadduma pay. Nakaawat metten kadagiti pammadayaw gapu kadagiti kontribusionna iti Literatura dagiti Ilokano ken iti Pagilian kas iti Pedro Bucaneg Award manipud iti GUMIL Filipinas, Gawad Pambansang Alagad ni Balagatas manipud iti UMPIL. Tubo iti Candon, Ilocos Sur.

RICARTE A.  AGNES. Premiado a mannurat iti sarita, nobelista, kolumnista iti Bannawag, naisaad kenkuana ti Pedro Bucaneg Award (2002) manipud iti GUMIL Filipinas, ti kangatuan a pammadayaw nga ipapaay ti nasao a gunglo kadagiti mannurat nga Ilokano. Kameng kadagiti nadumaduma a gunglo iti Hawaii, adviser ti GUMIL Oahu ken maysa kadagiti nakipagbangon iti nasao a chapter ti GF. Maysa nga inhiniero, nagpaay kadagiti nadumaduma nga ahensia ti gobierno iti Filipinas sakbay a nagnaed iti Hawaii. Tubo iti Sarrat, Ilocos Norte.

ROGELIO A. AQUINO (Setiembre 15, 1946- ). Naipasngay iti Tucalana, Lallo, Cagayan. Premiado a mannurat. Adu a sarita, salaysay, ken novela ti naipablaakna iti Bannawag.

ROLAND PE. URATA. Maikapito kadagiti sangapulo nga annak daydi Silvestre Urata ken sigud a Felicidad dela Peña. Naipasngay idi Setiembre 8, 1951. Maysa kadagiti nangbangon ken panuli ti GUMIL Cagayan, a pakairamanan dagiti kakabsatna a da Antonio ken Arthur. Adu a seminar-workshop ti inorganisarda a nakamulian dagiti nalalaing itan a mannurat iti Cagayan. Nagleklektiur ken naghurado kadagiti pasalip iti panagsurat iti salaysay ken sarita. Napili pay a direktor ti GUMIL Filipinas idi 1987. Nagserbi iti naunday a panawen iti Department of Public Works and Highways. Pimmusay idi Agosto 17, 2001. Inulilana da Vicky nga asawana ken ti dua a barona, da Junjun ken Raymond.

ROLANDO A. SEGURO, JR. Nayanak iti nasulinek a bario ti Minanga Sur, Lasam, Cagayan ngem dimmakkel idiay Matucay, Allacapan, Cagayan.  Kakaisuna a lalaki iti innem nga annak da Rolando Sr. ken daydi sigud a Leticia Allovida ti Calaoagan Bassit, Gattaran.  Inleppasna ti Bachelor of Science in Accountancy iti Cagayan Colleges Tuguegarao (University of Cagayan Valley itan).  Agdama ita nga Accounting Department Head iti Rural Bank of Gattaran-Allacapan Branch.  Nangala iti units-na iti Education ket napagasatan a nakaipasa iti Licensure Examination for Teachers (LET) idi Septiembre 29, 2013.  Duan ti annakda ken ni sigud a Levie Ramos ti Bulo, Allacapan, Cagayan, da Angelica Faith ken Leigh Louis.

RONNIE E. AGUINALDO. Naipasngay idi Nobiembre 25, 1990 iti Minabel, Puro Camiguin, Calayan, Cagayan. Inauna iti innem a saringit da Rudy Paleracio Aguinaldo ti Villa, Santa Teresita, Cagayan ken sigud a Veronica Dalo Estorba ti Minabel. Nagturpos iti elementaria iti Minabel Elementarey School ken iti haiskul iti St. Francis Academy iti Santa Teresita. Inleppasna ti Electronics-NCII iti Aparri School of Arts and Trade. Inyenrolna ti BS Education iti Cagayan State University-Gonzaga Campus. Kas mannaniw, aktibo saan la a kas agsursurat no di pati kas mannaniw iti radio. Nagpaay a kas co-host ti Uged ken Aweng ti Pluma (UKAP) a programa iti DWTS community radio ti Santa Teresita a pakaibasbasaan dagiti daniw nga Ilokano. Adun ti daniw ken saritana a naipablaak iti Bannawag. Premiado a mannurat, inyalatna ti Maika-3 a Gunggona iti salip ti sarita ti AMMAFLA 2008-2009, ken ti Umuna a Gunggona iti salip iti daniw a para ubbing ti GUMIL Ilocos Norte idi 2011. Nagpaay pay a presidente ti GUMIL Santa Teresita.

ROSALIE A. BARNACHEA. Tubo iti Caliguian, Burgos, Isabela, naipasngay idi Marso 21, 1983 kada Rodrigo Garcia Barnachea iti Balintocatoc, Santiago, Isabela (Agoo, La Union ti puonda) ken sigud a Fely Peralta Albano ti Caliguian (naiyanak sadiay Pinili, Ilocos Norte). Nagbasa iti BS Industrial Education iti Isabela State University. Nagtrabaho iti nadumaduma nga establisimiento ti komersio iti Santiago City, Alabang, ken Laoag City sakbay a nagobra idiay Dubai, UAE. Iti agdama, agob-obra kas OFW iti Hong Kong, a pangiraprapinanna nga agputar iti dandaniw ken sarita. Addan sumagmamano a daniwna a naipablaak iti Bannawag.

ROSITO D. PIMENTERO. Limtuad ken nagsulbod iti Centro, Buguey, Cagayan. Nagelementaria iti Buguey Central School ken naghaiskul iti Northeastern Academy iti ilina. Nangala iti Bachelor of Science in Animal Husbandry iti Araneta University. Naipablaak dagiti sinuratna iti The Aggie a magasin ti nasao nga universidad. Imbes a dagiti dinguen ti bakunaan ken ineksionanna, dagiti ketdi tao kas Rural Sanitary Inspector ti Department of Health, RHU, Lasam, Cagayan (1975-1988) a nagkatrabahuanda ken sigud a Marilou Pajarillo Ramones a nagbalin a kasimpungalanna. Nagpresidente iti GUMIL Lasam. Namindua met a nag-External Vice President ti GUMIL Cagayan. Sinuratna iti Bannawag dagiti maipapan iti insurhensia iti Cagayan idi dekada 80s. Nagpa-America idi 1988. Maysan a U.S. citizen ken agnaeden iti Hawaii Grande. Premiado a mannurat iti Hawaii.

ROY V. ARAGON. Naipasngay ken dimmakkel iti Mabasa, Dupax del Norte, Nueva Vizcaya ngem agnanaeden iti Cagayan. Fiksionista, mannaniw, agiwarwarnak (sigud nga editor-in-chief ti linawas a Valley Journal, maysa a regional newspaper a nakabase iti Bambang, Nueva Vizcaya), translator, book editor/designer, computer specialist (hardware, networking, Linux, Windows, server administration), internet aficionado (web development, portal administration, Ilokano open source software ken web translation projects; ken blogger). Maysa a book collector ken bookworm, kaludludonna dagiti agkaiwara a liblibro iti kama wenno kuartona. Managluto pay ken mannida iti pinakbet, dinengdeng, kappukan, pinapaitan ken dadduma pay, a namkuatanna nga agbalin a serioso a food blogger (kitaen ti Pinakbet Republic, pinakbetrepublic.blogspot.com, ken sumali iti impundarna a maysa kadagiti kalalatakanen a food and drink page iti Facebook, ti Ilokano Food, facebook.com/ilokanofoods). Nakaipablaaken iti Bannawag, Liwayway, Rimat, Samtoy, Tawid, Filipino Magazin, Sunday Inquirer Magazine ken dadduma pay a pablaakan a printed, digital ken web-based. Kas mannakisalip, nagab-abak metten iti GRAAFIL, Palanca, Talaang Ginto, kdpy. Fellow iti Ilokano Fiction iti 26th U.P. Writers Workshop idi 1996. Inruarna idi 2000 ti umuna nga Ilokano e-book, ti Napili ken Saan a Napili a Dandaniw ken Dadduma Pay a Riknakem, a nakaurnongan ti 40 a dandaniwna, nga imparangkapna kas libre a ma-download iti website-na. No saan a makiganggantil kadagiti ingungotenna iti biag a da Jane, Sadiri, Sirmata ken Imnas, pamrayanna nga ap-aprosan dagiti nasingpet a pusana a da Maui, Gary ken Garfield a mangkadkadua kenkuana kadagiti parbangon nga agmaymaysa a kadennana ti computer, kape (pasaray pay brandy), musika, libro ken dagiti di agpakaturog nga idea a mulmulmolan ti isipna ken dildilpatan dagiti ramayna a makumikom nga agpisel ken agapros iti keyboard tapno agparuar iti balikas dagiti letra ket agimas, agalimpatok latta ti mannurat ken kinamannurat kenkuana.

ROWENA G. RUIZ. Naipasngay idi Disiembre 4, 1980 idiay Quirino, Ilocos Sur. Umuna a bunga da Anselmo Ruiz ken Francisca Galangey. Nagturpos iti Midwifery iti University of Northern Philippines – Candon City. Nagtrabaho a social worker iti maysa a non-government organization iti Siudad ti San Fernando iti La Union. Maysa itan nga OFW iti Hong Kong. Iti nasao a lugar, masansan nga aghurado kadagiti pasalip iti pageant manipud panangabakna idi 2009. Kameng iti Grupo Dagiti Mannurat nga Ilokano iti Hong Kong. Pagaayatna nangruna no awan ob-obraenna ti agbasa kadagiti nadumaduma a libro ken ti agsurat iti daniw.

RUDY RAM. RUMBAOA. Maikadua iti uppat nga annak da Adelindes ken Dios-ti-aluadna nga Emeterio iti Laoag City, nagtrabaho a newswriter iti maysa a radio station iti nasao a siudad sakbay a nagpa-Hawaii idi 2000. Malaksid iti daniw ken ababa a sarita, agparpartuat met iti kankanta nga Ilokano— pagirayan nga agpapada nga ibisbislinna iti trabahona iti maysa a longterm nursing care facility iti Kahului, Maui. Autor ti “Di Nakapappapati, Ngem Pudno” a kolum iti Fil-Am Observer, lokal a pagiwarnak dagiti Filipino iti Hawaii. Ni dati a Monica J. Montano ti kaingungotna, ket adda maysa nga anakda, ni Sofia Monique.

SHERMA E. BENOSA. Freelance writer ken editor ti nadumaduma a magasin. Autor ti Dagiti Babassit nga Alipugpog, antolohia dagiti sarita, kas paset ti UBOD New Author Series ti NCCA idi 2010. Lepleppasenna ti masteralna iti UP Diliman a nagturposanna iti kolehio, a nakatuon ti panagadalna iti Lengguahe dagiti Ilokano. Tubo iti Bambang, Nueva Vizcaya.

VIC P. PACURSA. Tubo ti Lasam, Cagayan. Premiado a mannurat iti sarita, daniw ken salaysay. Sinuratna ti nai-Bannawag a salaysay maipapan iti padasna kas OFW iti Middle East a nagam-udan ti umuna a Gubat iti Gulpo, idi rinaut ti Iraq ti Kuwait.

VICENTE P. PALCONG. Tubo iti San Ildefonso, Ilocos Sur, nagturpos a Cum Laude iti B.S. in Industrial Education. Nalpasna ti Master of Arts in Industrial Education, nangisuro iti eskuela publika ken iti EARIST iti Manila. Eksperto iti Technical-Vocational Education and Training, nadumaduma a pagilian ti naadakanna gapu iti trabahona iti International Labour Organization ken United Nations. Adun dagiti sarita, salaysay ken daniwna ti naipablaak iti Bannawag. Kaingungotna ni sigud a Victoria Castro ket tallo ti bungada.

VILMER V. VILORIA. Malaksid iti kinapolitikona, am-ammo kas agiwarwarnak ken agirakrakurak iti radio.Mannurat iti salaysay ken mannaniw. Agdama a Bise-Presidente iti GUMIL Filipinas ken mamagbaga iti GUMIL Cagayan. Consultant iti Mangngaggos Club wenno maibilang a Grandmaster Mangngaggo. Pagaayatna ti agkanta ken agisagana iti masida nangruna iti kilawen.

VIVENCIO S. BACLIG. Tubo iti Cabugao, Ilocos Sur, nangala iti Associate in Arts iti UP Diliman, ken nagturpos iti abogasia iti MLQU School of Law. Maibilang kadagiti nadumaduma a nagpaayanna: hepe ti Provincial Fiscal’s Office (Ilocos Sur); hepe ti City Prosecutor’s Office (Olongapo); chief of staff ni Undersecretary of Justice Silvestre H. Bello III. Agdama a presiding judge iti RTC, Branch 77, Quezon City; propesor iti MLQU School of Law ken iti Philippine Christian University College of Law. Kalpasan ti panagretirona nga ukom iti Regional Trial Court iti Quezon City, nagsubli a nagsurat (kolumnista iti Bannawag) a kunana nga umuna nga ayatna. Agdama a presidente ti GUMIL Metro Manila ken GUMIL Filipinas.

DAP-AYAN 2013 (3)


Dagiti baro nga opisial ti GUMIL Filipinas nga agtakem iti 2013-2015 nga idauluan ni Arthur P. Urata, Sr. (maikadua iti kanawan). Agpakanawan: Mario T. Tejada, Bise Presidente; Roy V. Aragon, Sekretario Heneral; Estela Bisquera-Guerrero, Auditor; Martin T. Rochina, Direktor; Vilmer V. Viloria, Direktor; Eliseo B. Contillo, Direktor; Ariel S. Tabag, Direktor; Emy Amad Z. Bucaneg, Direktor; Freddie P. Masuli, Direktor; Aileen R. Rambaud, Direktor; Judge Vivencio S. Baclig (Ret.), Ex-Officio Director; ken Arthur P. Urata Sr., Presidente. Binayabay ida ni Honor Blanco Cabie, dati a GF President, a nagpaay a chairman ti COMELEC (kakanawanan). Awan iti ladawan dagiti dadduma pay nga opisial, da: Eden C. Bulong, Tesorera; Benjamin P. Pacris, Business Manager; Reynaldo E. Andres, Press Relations Officer; ken Sherma E. Benosa, Direktor. (Rinetrato ni Jennifer Aribuabo Tagavilla)
 Ti Maika-45 a Kombension Nasional ken Literary Seminar ti GUMIL Filipinas

“Agkaykaysa, Pumigpigsa” (3)

Teksto ken Ala ni ROY V. ARAGON

AGKAYKAYSA. Ken pumigpigsa. Kas ‘tay pagsasao nga, “In unity, there is strength.” No apay a kastoy ti tema ti Maika-45 a Kombension Nasional ken Literary Seminar ti GUMIL Filipinas, kayat a paneknekan ti gunglo nga iti laksid nga adda met dagiti di panagkikinnaawatan, kas normal wenno gagangay iti maysa nga organisasion, adda latta panagkaykaysa dagiti mannurat nga Ilokano. Daytoy a panagkaykaysada para iti maymaysa a panggep (ti pannakasaluad ken pannakaparang-ay ti literatura dagiti Ilokano) isu met ti mangpatpatibker latta tapno agtultuloy ti isasantak ti gunglo— ita, iti maika-45 a tawenna, ken iti masakbayan.

Wen, 45 a tawenen ti GUMIL Filipinas. Tawen 1968 idi pormal a nabangon ti gunglo a salinong dagiti immuna a nabukel a grupo wenno gunglo dagiti agsursurat iti Ilokano kadagiti probinsia.

Oktubre 19, 1968, iti Baguio Tech sadiay Siudad ti Baguio, iti okasion ti pannakapadayaw dagiti nangabak iti Salip ti Sarita nga insayangkat ti Bannawag, a naangay ti eleksion dagiti umuna nga opisial ti GUMIL Filipinas.
Dagiti nangabak iti Reynaldo A. Duque On-the-Spot Essay Writing Contest. Nagun-od ni Mario S. Ascueta, mikatlo manipud iti kanigid ti Umuna a Gunggona (yaw-awat ni Ret. RTC Judge Vivencio S. Baclig, maikadua iti kanigid a binayabay ni nagpresidente ti GUMIL Filipinas Dionisio S. Bulong, kakanigidan, ti premiona). Ni Lenita S. Baclig, maikapat manipud iti kanigid, ti nangabak iti Maikadua a Gunggona; ken Maricel S. Battung, kakanawanan, Maikatlo a Gunggona. (Teksto ken Rinetrato ni Jorge Placido)

Dagiti met nangabak iti Reynaldo A. Duque On-the-Spot Poetry Writing Contest. Umuna a Gunggona: Mario S. Ascueta (maikatlo iti kanigid), Herman S. Cardenas, Maikadua (maikapat iti kanigid) ken Danny Villena, Maikatlo (kakanawanan). Kaduada met laeng iti ladawan da Dionisio S. Bulong, dati nga Editor-in-Chief ti Bannawag ken nangimaton iti salip; ken RTC Judge Vivencio S. Baclig (Ret.). (Teksto ken Rinetrato ni Jorge Placido).

Dagiti polis a kumakanta ken musiko ti PNP RECOM 02 Band nga inkuyog ni Regional Director Rodrigo P. De Gracia a nangliwliwa kadagiti delegado babaen dagiti kanta nga Ilokano ken agdama a hits a kas iti Gangnam Style ni Psy.

Ti Gonzaga String Band a nangliwliwa met kadagiti delegado kadagiti makaduayya a samiweng.


Dagiti Senior Citizens ti Gonzaga a nangipabuya iti naisangsangayan a folk dance.

Pakalaglagipan a ladawan ti sumagmamano a delegado iti kombension. Kinagrupoda ni GUMIL Maui President Arnold C. Baxa (kakanawanan). Agpakanawan: Gladys Reyes, Leonora R. Melchor, Joel B. Manuel ken Janet Aguba ti GUMIL Ilocos Nore; ken da agina a Lani Matias Jose ken Pamela Joy M. Jose ti Gattaran, Cagayan.


Kas pananglagip, dagitoy man dagiti nagpaay a kaunaan nga opisial ti GF: Arturo M. Padua, presidente; Pelagio A. Alcantara, bise-presidente; Guillermo R. Andaya, executive secretary; Prescillano N. Bermudez, treasurer; Joven F. Costales, auditor; Pacita C. Saludes, business manager; ken Manuel S. Diaz, press information officer. Dagiti direktor: Juan S.P. Hidalgo Jr., Juan A. Alegre, Rodrigo M. Manongdo, Peter La, Julian, Virgilio E. Vives, Mauro F. Guico, Fredelito L. Lazo, ken Melita Bautista. Mamagbaga da Gregorio C. Laconsay, Dr. Godofredo S. Reyes, Dr. Hermogenes F. Belen ken Propesor Santiago Alcantara.
Sumagmamano kadagitoy a pioneers ti kameng itan ti “GUMIL Langit” (imaginary a gunglo dagiti Gumiliano ken Gumiliano nga addan iti nagkaysa a biag).

Uppat a pulo ket lima a tawen kalpasanna, iti eleksion a naangay iti Gonzaga, Cagayan, napili met dagiti sumaganad a mangidaulo iti GF iti 2013 agingga iti 2015: Arthur P. Urata, Sr., presidente; Mario T. Tejada, bise-presidente; Roy V. Aragon, sekretario-heneral; Eden Cachola-Bulong, treasurer; Estela Bisquera-Guerrero, auditor; Benjamin P. Pacris, business manager; Reynaldo E. Andres, public relations officer; dagiti direktor: Sherma E. Benosa, Emy Amad Z. Bucaneg, Eliseo B. Contillo, Freddie Pa. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Babaen kadakuada ken iti pannakikaykaysa dagiti amin a kameng ti gunglo, manamnama a mapapigsa pay ti GF, nangruna dagiti nadumaduma a chapters kadagiti probinsia, para iti pannakataginayon ken pannakapadur-as pay ti Literatura nga Ilokano ken ti pagsasao nga Ilokano.


(Naipablaak iti Bannawag, Mayo 27, 2013 a bilang.)


DAP-AYAN 2013 (2)

Dap-ayan 2013: Maika-45 a Kombension Nasional ken Literary Seminar ti GUMIL Filipinas

“Agkaykaysa, Pumigpigsa” (2)

Teksto ken Rinetrato ni ROY V. ARAGON

NAKALLALAGIP ti Maika-45 a Kombension Nasional ken Literary Seminar ti GUMIL Filipinas, saan la a gapu ta inturong ket impasiarna dagiti delegado iti maysa kadagiti kamurdongan nga ili iti Amianan a Luzon, iti Gonzaga, Cagayan, ket napnekda iti sang-aw ken anasaas ti baybay ken iti litnaw ken lamiis ti karayan; ngem maysa a nangruna a malaglagip iti daytoy a panagtataripnong ken panagiinnadal ket ti banag nga ad-adu man itan ti bilang wenno ti partisipasion dagiti agtutubo a mannurat nga Ilokano.

Wen, ta kadagiti pay laeng nagpaay a panelist wenno lecturer kadagiti naangay a panel discussion, kaaduan ti maibilang nga ubbing wenno nauubbing pay. Maiduma daytoy kadagiti napalpalabas a kombension ti GUMIL Filipinas a no lecturer wenno speaker, kunam, inanamaemon ‘tay natataeng, nalaklakay wenno nabakbaket, mas senior iti edad a kas man pangipaduyakyak iti autoridad wenno ad-adu nga ammo a maisuro. Ngem kas napaneknekan manen itoy a kombension, iti panagsuratan man wenno iti panangibingay iti ammo, awanen ti makuna a lakay wenno ubing, agpapadadan.

Aw-awaten ni Jobert M. Pacnis ti Ballesteros, Cagayan ti premiona ken ni GF President Judge Baclig a kas kakaisuna a nangabak (Special Prize) iti Salip iti Sarita ti 2nd ALVIYA Literary Foundation a binangon ni mannurat iti Bannawag Alex V. Yadao ti Abulug, Cagayan ngem agnanaeden iti New York, U.S.A. Kaduada iti ladawan ni sigud a Bannawag Editor Dionisio S. Bulong, kameng ti hunta dagiti hurado. Adda iti kakanigidan ni Dr. Freddie P. Masuli a mangimatmaton iti Pasalip ALVIYA.


Ni GUMIL Metro Manila Sherilyn T. Viloria, Miss GUMIL Filipinas 2013, kalpasan ti panangisaad da Gonzaga Mayor ken Mrs. Carlito F. Pentecostes, Jr. iti koronana. Nagpaay met a konsortena ni GMM Director Virgilio C. Tabugadir.

Nakiragup ni Arthur P. Urata, Sr., Presidente ti GUMIL Cagayan ken nabotosan a baro a Presidente ti GUMIL Filipinas (2013-2015), maikapat manipud iti kanigid ken ni Mutia ti GUMIL Filipinas 2013 Sherilyn Viloria ti GUMIL Metro Manila, maikatlo manipud iti kanigid. Kaduada iti ladawan da Virgilio Tabugadir, kameng ti hunta direktiba ti GUMIL Metro Manila, a konsorte ti reyna, Jasmin Garcia ti GUMIL Gonzaga, 2nd runner-up, ken Jennifer Tagavilla ti GUMIL Ilocos Norte, 1st runner-up. (Rinetrato ni Jorge Placido)

Ni GUMIL Maui President Arnold C. Baxa (kakanawanan), kakaisuna a delegado manipud iti ballasiw-taaw a nangikagumaan iti yaatendarna iti Maika-45 a Kombension ken Literary Seminar ti GUMIL Filipinas. Kaduana iti presidential table da GUMIL Filipinas Vice-President Vilmer V. Viloria (nagtaray ken nabotosan kalpasanna a director) ken Atty. Rodrigo P. De Gracia, Regional Director ti PNP Regional Command 02 a nagpaay a naisangsangayan a sangaili ken nagsarita iti kombension.

Dagiti baro a kameng ti GUMIL Filipinas iti panagsapatada iti panangannong ni GF President Retired RTC Judge Vivencio S. Baclig. Nairaman kadakuada da Ridel T. Cabulisan, Ronelyn B. Ramones, Leonora R. Melchor, Gladys Reyes, Rhea Rose D. Berroy ken Imelda D. Toledo.

Dagiti Mutia ti GUMIL Filipinas 2013 (agpakanawan): Miss GUMIL Ilocos Norte Jennifer A. Tagavilla, 1st Runner Up; Miss GUMIL Metro Manila Sherilyn T. Viloria, Miss GUMIL Filipinas 2013; ken Miss GUMIL Gonzaga Jasmin C. Garcia, 2nd Runner Up.

Sumagmamano kadagiti kameng ti GUMIL Ilocos Norte a dimmar-ay iti kombension nga indauluan ni Elizabeth M. Raquel (sango, maikatlo iti kanigid). Nairaman iti ladawan da Marjorie Tagayona Felipe, Jennifer A. Tagavilla, Aurea S. Austria, Rosario A. Bingayen, Milagros Sagadraca, Adoracion Salantes, Janet Acoba ken Narcisa Acosta. (Rinetrato ni Jorge Placido)

Sumagmamano kadagiti kameng ti GUMIL Cagayan, ti gunglo a nangsangaili iti GF convention, a nangbantay iti registration table.

Saan met ngata a nairanrana, ngem madlaw met ti ad-adu nga nauubbing a delegado. Paneknekan daytoy ti idadar-ay dagiti agdadamo a a mannurat wenno mangrugrugi nga agsurat iti bukodda a pagsasao (Ilokano), kas koma kada Pamela Joy Jose ti Gattaran, Cagayan; Roselyn Campano ti Gonzaga, Cagayan; Rhea Rose Berroy ti Manabo, Abra; Angeluz Biz ti Sta. Teresita, Cagayan; Sherilyn Viloria ti Gattaran, Cagayan; Pearl Dacuag ti Gamu, Isabela; Ronelyn Ramones ti Bacarra, Ilocos Norte; Jennifer Tagavilla ti Siudad ti Batac; Marie Rita Brillantes ti Siudad ti Candon; kdp.

Dakkel la ketdi ti akem dagiti agtutubo iti GUMIL iti pannakaitultuloy ken pannakasalimetmet dagiti panggepna. Isu ngata nga uray kadagiti napili nga opisial ti gunglo nga agtakem iti 2013, adu kadakuada ti maibilang nga ubbing wenno naub-ubing ngem kadagiti dati nga opisial. A maysa manen a malaglagipto iti pakasaritaan ti GUMIL a sigsigud nga idadauluan wenno iwarwardas dagiti nataengan.

Mangnamnamatayo ngarud nga ad-adda a pumigpigsa ti GUMIL Filipinas ket agkaykaysa amin a mannurat nga Ilokano para iti maymaysa a panggep, ti pannakapatan-ay ken pannakaidur-as ti Literatura nga Ilokano ken ti pagsasao nga Ilokano.

(Adda Tuloyna iti Ngato)