Bul-ul: Dios Ti Ani Iti Ifugao

Ti bul-ul (nakatakder ken nakatugaw), iti daan nga Ifugao, isu ti pisikal a ladawan ni Maknongan (ti Dios dagiti nagkauna nga Ifugao) a mangibagi met iti maysa a saad a kas mangaywan kadagiti apit a pagay manipud kadagiti payo wenno natukadtukad a kataltalonan ti maysa a kaamaan nga Ifugao.

Bucaneg Awardee Cris Ilustre, 74

Lima nga aldaw kalpasan a naipakaammo kenkuana nga isu ti napili a kakaisuna a 2014 Pedro Bucaneg Awardee ti GUMIL Filipinas, pimmusay ni beterano a mannurat Crisostomo M. Ilustre iti pagtaenganda iti Bantay, Ilocos Sur idi Marso 26.

Maika-46 a Nailian a Kombension

Angayen ti GUMIL Filipinas (GF), ti kadakkelan a gunglo dagiti mannurat nga Ilokano iti sangalubongan, ti Maika-46 a Nailian a Kombension ti GF iti daytoy Abril 18-20, 2-14 iti Cabicungan Inn, Centro 05, Claveria, Cagayan (nayakar manipud iti Sanchez Mira, kas immunan a naipakaammo).

Dagiti Grantee iti 2013 National Book Development Trust Fund

Napili da Sherma E. Benosa, Linda Lingbaoan-Bulong ken Ariel S. Tabag kadagiti a grantee iti nobela nga Ilokano ti 2013 National Book Development Trust Fund.

Dagiti baro nga opisial ti GUMIL Filipinas

Dagiti baro nga opisial ti GUMIL Filipinas nga agtakem iti 2013-2015

5th Pasnaan Literary Workshop ti GUMIL Filipinas, silulukaten

Dagiti fellows ken panelists ti Pasnaan 4.

Thursday, February 20, 2014

Tallo a mannurat nga Ilokano, grantee para iti nobela nga Ilokano ti 2013 National Book Development Trust Fund



Napili da Sherma E. Benosa, Linda Lingbaoan-Bulong ken Ariel S. Tabag kadagiti a grantee iti nobela nga Ilokano ti 2013 National Book Development Trust Fund.

Ipaayan ti National Book Development Board  (NBDB) ti tunggal maysa kadakuada iti P200,000 a grant tapno leppasenda ti nobelada iti makatawen.

Napauluan iti “Bantay Asin” ti nobela ni Benosa; “Kalinawa” ken ni Bulong; idinto ta “Panangsapul iti Puraw a Kabalio” ken ni Tabag.

Naipaayan met iti grant para iti lokal a pakasaritaan ti probinsia a naisurat iti Ingles wenno Filipino da Lilian C. Dela Peña, Anna Christie V. Torres, Danilo M. Gerona ken da Jeena Rani Marquez-Manaois ken Ma. Elena Paulma, ken para iti pagbiagan/baro a teknolohia iti panagnegosio ni Annabelle M. Calleja.

Naiwayat ti seremonia ti pammadayaw iti opisina ti NBDB iti Ortigas, Pasig City itay Enero 30, 2014.


Maysa nga ahensia ti gobierno, panggep ti NBDB ti mangiwayat kadagiti nadumaduma a gannuat a mangitag-ay iti kalidad dagiti libro iti Filipinas.

46th GF Convention inton Abril 18-20, mapagpapatangan iti GF Board Meeting

Maysa kadagiti kangrunaan a mataming iti maikapat a GUMIL Filipinas board meeting inton Marso 1 ti pannakaangay ti 46th GF National Convention inton Abril 18-20 iti MASCOOP Resort and Training Center, Masisi, Sanchez Mira, Cagayan, kas impakaammo ni GF President Arthur P. Urata, Sr.

Sangailien ti Pamilia Masuli (Dr. ken Mrs. Freddie P. Masuli) ti board meeting iti pagtaenganda iti Centro 2, Sanchez Mira, Cagayan.

Malaksid kadagiti opisial ti GUMIL Filipinas, maipaganetget pay ti itatabuno dagiti presidente/pannakabagi dagiti GUMIL Provicial Chapters. (RVA)

Wednesday, February 19, 2014

Nailian a Komperensia iti Lengguahe ken Literatura Dagiti Ilokano, maangay

Maangay ti Kur-it ken Kurditan: Pambansang Kumperensiya sa Wika at Panitikang Ilokano babaen ti panangilungalong ti GUMIL Filipinas (GF), iti pannakitinnulong ti Komisyon sa Wikang Filipino (KWF), National Commission for Culture and the Arts (NCCA), Unyon ng mga Manunulat sa Pilipinas (UMPIL), University of Northern Philippines (UNP), ken LGU Vigan City inton Abril 25-27, 2014 iti UNP Auditorium, University of Northern Philippines, Vigan City.

Mataming iti nasao a komperensia dagiti pakaseknan ti lengguahe ken literatura dagiti Ilokano a kas iti ortograpia, panagisagana iti material para iti MTB-MLE, pakaseknan dagiti mannurat nga Ilokano, ken ti pannakaipaset ti literatura dagiti Ilokano iti nailian a literatura babaen ti panangwarwar dagiti mabigbigbig a mannurat, kritiko ken edukador nga Ilokano ken Tagalog kadagitoy a pakaseknan.

Agpaay met a keynote speaker ni Dr. Virgilio S. Almario, National Artist for Literature ken agdama a pangulo ti KWF.

Silulukat daytoy a komperensia kadagiti amin a titser, mannurat, cultural worker, linguist, ken aminen a mangipatpateg iti lengguahe ken literatura dagiti Ilokano.

Para iti ad-adu pay nga impormasion, ag-e-mail iti tantiyado@gmail.com (para iti KWF), ken sherma.benosa@gmail.com (para iti GF). (Kur-it ken Kurditan Secretariat)

21 a Sarita, naisalip iti Pasalip ALVIYA

Duapulo ket maysa a sarita ti naisalip iti Maika-3 a Pasalip ALVIYA. kas ipakpakaammo ti Secretariat ti nasao a pasalip.

Dagiti naisalip a sarita agraman parbo a nagan dagiti autor:

“Ti Manggagamot”  ni Parisian,  “Ni Angkel” ni Bin Yang, “Nil Sine Numine” ni  Fanerrie delos Reyes, “Bunga” ni Biding,  “Ti Nangisit a Darat: Parabur wenno Lunod” ni  Sagrado T. Sacramento,  “Tao ti Kalkalsada” ni Emmanuel C. Estrada;

“Politika” ni Awan Naganna;  “Payak” ni Dina Naussica; “Dalluyon” ni  Wave 100, “Indio” ni Oda Saniata, “Cadena de Amor” ni Imelda Gamat, “Navotas Fish Port” ni Salmon Quen Kamatis, “Mam Mayleen Parel: Pilantropo” ni Gali Muy-od, “Gapu ken ni Angelica” ni  Jireh Katrinah, “Panagpatubo” ni Francinegilda Umidda, “Lima a Kurengreng ti Ima a Namureng” ni  Warlito Guerrero;

“Panagturpos” ni Apong Diet,  “Tikboy Tacuboy” ni Miguel Tabaco, “Dagiti Asterisko Ti Mennamenna, Maysa a Malem, Iti Malamlammin a Biag ti Maysa a Mabagbagtit a Mannurat” ni St. Sanuong de Ahihihi, “Nana Orang” ni Nicole Villamor ken ti “Ti Napanawan” ni Andrea Fonicier.

Maipakaammo dagiti mangabak a sarita iti umuna a lawas ti Abril 2014 ket mapadayawanto dagitoy iti Nailian a Kombension ti GUMIL Filipinas sadiay MASCOOP Resort and Training Center, Masisit, Sanchez Mira, Cagayan inton Abril 18-20, 2014.

Daytoy Pasalip ALVIYA ti maysa ken kadakkelan kadagiti kontribusion ni Alex Vicente Yadao, tubo ti Libertad, Abulug, Cagayan ngem  agnaeden iti New York City, iti pannakaparangen ti Literatura Ilokana.
Malaksid iti daytoy a pasalip, tumultulong pay iti tinawen a pannakaangay ti Pasnaan, ti literary workshop para kadagiti agdadamo a mannurat, ken iti panagilibro dagiti gapuanan dagiti Ilokano a mannurat. (Freddie Pa. Masuli)

Wednesday, February 5, 2014

Rehional a komperensia iti Panagadal iti Material a Kultura ti Cordillera

Angayen ti Unibersidad ti Filipinas-Baguio (UP Baguio) ti umuna a Rehional a Komperensia maipanggep iti Panagadal iti Material a Kultura ti Cordillera (1st Regional Conference on Cordillera Material Culture Studies) inton Mayo 30-31, 2014 iti UP Baguio, Siudad ti Baguio.

Mainaig itoy, agawaten ti secretariat ti komperensia kadagiti proposal para iti indibidual a presentasion ken panel para kadagiti sumaganad a kategoria: study on indigenous material culture; utilitarian and ritual objects as material culture; material culture in the museum; bodily adornments as material culture; landscape and material culture.

Silulukat ti secretariat nga agawat kadagiti abstract agingga iti Marso 1, 2014. Para iti ad-adu pay nga impormasion, bisitaen ti www.cordillerastudies.upb.edu.ph wenno mabalin ti makiuman iti materialculture.csc@gmail.com wenno (074) 442-5794. (Junley Lazaga)